HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
ITINANGHAL mang Bb Pilipinas 1st runner up at sunod-sunod ang projects at endorsement, never tatanggalin ni Herlene Budol ang taguri sa kanya bilang Hipon Girl.
Katwiran ni Herlene, ito ang unang taguri na nagpasikat sa kanya kaya hinding-hindi niya ito aalisin kahit sikat na siya.
Sa pagpirma ng kontrata ni Herlene bilang ambassador ng Rejuviant Premium Cocoberry at Body Wash at Premium Instaglow Lotion, ipinagdiinan ng Kapuso actress at beauty queen na kahit may korona na siya bilang beauty queen at isa na ring brand endorser, hindi niya naisip na ibasura ang pagiging “Hipon Girl.”
“Hindi ko aalisin ‘yun, ‘no! I love hipon,” katwiran nito nang matanong kung aalisin na ang taguri sa kanya bilang Hipon ngayong beauty queen at ambassador na.
“Rati, favorite ko na ‘yun, eh. Wala, eh! Ikaw ba naman, since 2018, lahat ng pinupuntahan ko ipinakakain sa akin lagi, hipon.
“Lahat ng klase. Kaya siguro ngayon, isa-isa na lang, ganyan. Dati, patay-gutom ako sa ganyan, eh,” katwiran pa nito.
“Hindi ko iwawala sa buong buhay ko ang pagiging Hipon Girl. ‘Pag nagpapakilala nga ako, eh, kahit maghahanap ako ng trabaho, sasabihin ko, Herlene Hipon Budol po ang sasabihin ko.
“Herlene Hipon Nicole Budol. O, ‘di ba, ang dami?
“Hindi ko siya wawalain, kasi, roon ako, eh (nakilala). Doon ako nag-start. Ang taong marunong lumingon sa pinanggalingan, mas iniaangat ng Panginoong Maykapal,” sambit pa ng beauty queen.
Sa kabilang banda, dahil sa pagiging down to earth at kutis porcelana, kinuha siya ng Rejuviant para maging brand ambassador. Kasama niya rito ang misis ni Luis Manzano, si Jessy Mendiola.
Si Jessy ang unang celebrity endorser ng Rejuviant na pag-aari ng pamilya ni Chique Ballon (CEO) at ikalawa si Herlene. Kaya naman ganoon na lamang ang kasiyahan ng dating host ni Willie Revillame sa Wowowin dahil ka-level na niya si Jessy.
Biro nito, para na silang mag-sister ni Jessy at kapag tumitingin siya ng mga picture sa social media naguguluhan na siya kung sino talaga si Jessy at kung sino si Hipon Girl.
Very proud at flattered si Herlene na kasama niya si Jessy na nag-eendoso ng mga beauty products at nagpapasalamat siya sa pamilya ni Ms. Chique sa tiwalang ibinigay sa kanya.
