NAHULOG mula sa ika-apat na palapag (4/F) ng pinapasukang paaralan ang Grade 1 pupil sa Navotas City kamakalawa ng hapon.
Kaagad isinugod ng security guard at utility personnel ng San Rafael Village Elementary School sa Tondo Medical Center (TMC) ang 7-anyos batang lalaki, kasalukuyang nakaratay matapos isailalim sa pagsusuri ng mga doktor.
Sa imbestigasyon ng mga tauhan ng Navotas Police Women and Children’s Protection Deks (WCPD), nasa ika-apat na palapag ng naturang paaralan sa Brgy. San Rafael ang bata nang makita ng utility personnel na si Rommel Ballad na nahulog dakong 2:30 pm.
Inatasan ni Ginoong Michael Daco, principal ng naturang paaralan, ang school teacher na si Ethenel Jaime, alalayan ang mga magulang ng bata na kaagad nagtungo sa pagamutan upang alamin ang kondisyon ng kanilang anak.
Hindi nakalagay sa ulat ng pulisya kung naglalaro o may kasama pang ibang bata ang biktima sa ika-apat na palapag nang mangyari ang insidente. (ROMMEL SALES)
