TODAS sa bala ng boga ang dating bise alkalde matapos barilin habang nagbibigay ng kanyang pagbati sa isang debut party nitong Huwebes, 11 Agosto sa Sitio Cupang, Brgy. Tayuman, sa bayan ng Lobo, lalawigan ng Batangas.
Kinilala ni P/Capt. Roy Cuevas, hepe ng Lobo MPS, ang biktimang si Romeo Sulit, 61 anyos, bise alkalde ng bayan ng Lobo mula 1998 hanggang 2010, at kasalukuyang nagsisilbing kalihim ng Sangguniang Bayan.
Ayon sa ulat, nagbibigay ang biktima ng kanyang pagbati sa isang debut party dakong 8:00 pm nang lapitan ng isang lalaki na siyang bumaril sa kanyang ulo.
Ayon sa mga testigo, nakasuot ng berdeng jacket, itim na short pants, at sombrero ang gunman na agad tumakas matapos maisagawa ang krimen.
Namatay si Sulit habang nilalapatan ng lunas sa District Hospital.
Patuloy ang isinasagawang imbestigasyon ng pulisya ng Lobo upang matukoy ang motibo sa likod ng pamamaslang.
