KRITIKAL ang kalagayan sa pagamutan ng isang lalaking tinarakan ng icepick sa dibdib ng kanyang kalugar sa Navotas City, kamakalawa ng hapon.
Kasalukuyang inoobserbahan sa Tondo Medical Center (TMC) ang biktimang kinilalang si Dave Dadullo, 35 anyos, residente sa Brgy., North Bay Boulevard North (NBBN) ng nasabing lungsod sanhi ng isang tama ng saksak sa dibdib.
Kasalukuyang pinaghahanap ang suspek na kinilalang si Romar Tadinaw, tauhan ng Brgy. NBBN at residente sa nasabing barangay.
Sa report ni P/Cpl. Florencio Nalus kay Navotas City police chief Col. Dexter Ollaging, dakong 5:30 pm nang maganap ang insidente sa Linchangco St., Brgy. NBBN.
Lumabas sa inisyal na imbestigasyon, papunta ang biktima sa barangay hall ng NBBN para dumalo sa gagawing pagdinig sa pagitan nila ng suspek nang biglang lumapit si Tadinaw, may hawak na icepick saka tinarakan sa dibdib si Dadullo.
Matapos ang pananaksak, mabilis na tumakas ang suspek sa hindi matukoy na direksiyon habang isinugod ang biktima sa nasabing pagamutan.
Patuloy na inaalam ng pulisya kung ano ang motibo ni Tadinaw na unang inireklamo ng biktimang si Dadullo makalipas ang ilang araw sa barangay. (ROMMEL SALES)
