SUMUKO ang dalawang suspek na sinasabing sangkot sa pananakit sa isang traffic enforcer ng Metropolitan Manila Development Authority (MMDA).
Nakapiit sa Pasay City Police Station ang suspek sa pambubugbog sa traffic enforcer ng MMDA na kinilalang si Asrap Paino.
Habang nasa pangangalaga ng Department of Social Welfare (DSWD) ang isa pang suspek na menor de edad (16 anyos), parehong e-trike driver, nang sumuko sa pulisya ang dalawa na sinabing sangkot sa pambubugbog sa MMDA enforcer sa kanto ng EDSA at Taft avenues sa Pasay City nitong nakalipas na buwan.
Aminado si Paino, kasama siya sa nambugbog sa traffic enforcer na si Jose Zabala.
Paliwanag ni Paino, natagalan siyang sumuko dahil natatakot siya pero kalaunan ay nagpasyang pumunta sa mga awtoridad upang magkaroon ng peace of mind.
Umapela ang Pasay Police sa walong iba pang kabilang sa mga natukoy na pangalan na sumuko na rin upang hindi mabagabag ang kanilang pag-iisip at bumigat ang kanilang kasong kinakaharap. (GINA GARCIA)
