MA at PA
ni Rommel Placente
ANG veteran at award-winning actor na si Tirso Cruz lll ang itinalaga ni Pangulong Bongbong Marcos bilang bagong pinuno ng Film Development Council of the Philippines (FDCP). Pinalitan na nito si Liza Dino.
Noong Martes, nanumpa si Tito Pip sa Malacanang kay Pangulong BBM.
Sa pahayag ng aktor sa ABS-CBN News, sinabi niyang hindi niya akalain na mahihirang siya sa nasabing posisyon.
“I am honored I was chosen. Mabigat na trabaho ito at kailangan ko rin ng tulong ng council,“ sabi ni Tirso.
Gayunman, iginiit ni Tito Pip na ang kailangang unawain din ng lahat na ang pagiging artista pa rin ang kanyang bread and butter.
Kaya kahit may posisyon na sa gobyerno ay hindi pa rin iiwan ni Tito Pip ang pag-aartista. Regular pa rin siyang napapanood sa FPJ’s Ang Probinsiyano na pinagbibidahan ni Coco Martin.
Congratulations Tito Pip. Naniniwala kami na magagampanan mo nang mabuti at tapat ang posisyon na iniatang sa ‘yo ng ating pangulo.