PATAY ang 41-anyos machine operator habang papasok sa kaniyang trabaho nang barilin ng kaniyang kapitbahay sa Novaliches, Quezon City, nitong Linggo ng umaga.
Kinilala ang biktima na si Celerino Rivas Bertiz, 41, biyudo, machine operator, residente sa B3 L2 Joan of Arc, Brgy. Gulod, Novaliches, Quezon City.
Kinilala ang suspek na si Arjay Renoso Ibañez, naninirahan sa Margarita St., Brgy. Gulod, Novaliches, QC.
Sa report ng Quezon City Police District (DPD) Novaliches Police Station 4, bandang 6:50 am kahapon, Lunes, 27 Hunyo, nang maganap ang insidente sa harap ng B3 L2 Joan of Arc, Brgy. Gulod, Novaliches.
Ayon kina PCpl Mario Del Rosario, Jr., at PCpl Jerwin Gregorio, mga imbestigador ng PS-4, papasok sa trabaho ang biktima nang biglang sumulpot ang suspek saka malapitang pinaputukan sa ulo si Bertiz.
Nang duguang bumulagta ang biktima, tila walang nangyari at kaswal na naglakad ang tumakas na suspek.
Ayon sa mga nakasaksi sa krimen, hindi nila nagawang harangin ang suspek sa takot na madamay sila.
Inaalam ng mga awtoridad ang motibo sa pamamaril habang tinutugis ang nakatakas na suspek. (ALMAR DANGUILAN)
