MALAMIG na selda kayakap ng isang laborer matapos dalhin sa kanilang bahay at pagsamantalahan ang kanyang 19-anyos gilfriend na may learning disabilities (ADHD) sa Navotas City, kahapon ng madaling araw.
Arestado ang suspek na kinilalang si Melvin Miranda, 28 anyos, residente sa Sitio Puting Bato, Brgy. North Bay Boulevard South (NBBS) Proper na nahaharap sa kasong paglabag sa RA 8353 (Rape).
Sa inisyal na imbestigasyon ng Navotas Police Women’s and Children Protection Desk (WCPD), nag-message ang suspek sa biktima na itinago sa pangalang Sheena, sa pamamagitan ng facebook messenger para makipagkita sa kanya sa labas.
Dakong 1:00 am, nang magkita ang dalaga at ang suspek ngunit dinala sa kanilang bahay ang biktima na sinimulang halikan sa labi.
Kasunod nito, hinubaran ng shorts ng suspek ang biktima hanggang tuluyan umanong pinagsamantalahan ang dalaga.
Hinanap ng ina ng biktima sa pamamagitan ng Facebook (messenger) hanggang malaman na kasama ng suspek ang kanyang anak.
Humingi ng tulong ang ina ng biktima sa mga tanod ng Brgy. NBBS Proper saka pinuntahan ang bahay ng suspek, na noon ay kasama ang dalaga, dahilan upang arestohin ang suspek. (ROMMEL SALES)