BINAWIAN ng buhay ang isang babaeng tumalon mula sa sinasakyang jeep nang nataranta dahil sa pagtirik nito sa daan sa bayan ng San Guillermo, lalawigan ng Isabela, nitong Linggo, 29 Mayo.
Batay sa imbestigasyon ng San Guillermo MPS, kinilala ang biktimang si Josie Ordenas, 51 anyos, na namatay dahil sa pinsala sa kanyang ulo.
Papunta sanang sentro ng bayan ang jeep na may kargang mais at siyam na pasahero nang bigla itong tumirik sa pataas na bahagi ng kalsada dahil naubusan ng gasolina.
Nabatid na nataranta ang mga sakay na pasahero nang umatras ito dahilan para magtalunan sila palabas ng jeep.
Nagalusan ang ilang mga pasahero na agad ding nalapatan ng lunas subalit minalas ang si Ordenas na napuruhan sa ulo na agad niyang ikinasawi. (Micka Bautista)
