PATAY agad ang isang ina, habang ang kanyang anim-buwan na sanggol ay binawian ng buhay sa ospital,
nang sumalpok ang isang sports utility vehicle (SUV), minamaneho ng isang retiradong opisyal ng Philippine Army, ang kanilang bahay sa lungsod ng Tabuk, lalawigan ng Kalinga, nitong Sabado, 28 Mayo.
Kinilala ang mga biktimang sina Claire Daluping, 39 anyos, kasambahay, at kanyang anak na si Kawhi,
6-buwan gulang.
Ayon kay P/Maj. Gary Gayamos, tagapagsalita ng Kalinga PPO, agad namatay si Daluping matapos mabangga ng sasakyan ang dingding ng kanilang bahay sa Sitio Dananao, Brgy. Lacnog, dakong 3:00 pm kamakalawa, samantala, sa ospital namatay ang kanyang sanggol na anak.
Dinala sa pinakamalapit na ospital ang mga sugatang sina Kristell Gasatan, 15 anyos; at Beverly Daluping, 14 anyos.
Sa inisyal na imbestigasyon, nabatid na pauwi sa Isabela ang driver na kinilalang si Edwin Ortiz, 65 anyos, retiradong Army officer, nang mag-overtake siya sa isang kotse na biglang kumabig pakaliwa.
Nang tangkain niyang pahintuin ang minamanehong sasakyan, accelerator ang kanyang naapakan imbes ang preno, dahilan ng pagsalpok nito sa bahay ng mga biktima.
Kasalukuyan noong nasa harap ng bahay ang mag-ina nang banggain ng sasakyan ang dingding, at sa lakas ng impact ikinasira ito ng sasakyan.
Kasalukuyang nasa kustodiya ng pulisya si Ortiz at nakatakdang sampahan ng pormal na reklamong reckless imprudence resulting in damage to property with double homicide and multiple physical injuries.
