SHOWBIZ KONEK
ni Maricris Valdez Nicasio
WALANG nakapigil kay Jodi Sta. Maria para magbahay-bahay para ikampanya ang tatlong kandidatong pinaniniwalaan niyang karapat-dapat manalo sa darating na halalan.
Nag-ikot si Jodi kasama ang iba pang volunteers sa Barangay Tumana sa Marikina City para ikampanya sina Vice President Leni Robredo, Senador Kiko Pangilinan, at human rights lawyer Chel Diokno, na tumatakbo bilang pangulo, bise presidente, at senador, ayon sa pagkakasunod.
“This is what I stand for and many have known me to be, you know, just quiet about certain things and I believe this is not the time to be quiet about what you stand for,” anang aktres.
“That’s also the reason why I went out there to show people kung sino iyong mga tao na sa puso ko ang magbibigay sa atin ng pag-asa. Kumbaga, there’s hope in pink,” sambit pa niya.
Iginiit din ni Jodi na hindi niya ginagawa ito para sa sarili kundi para sa mga Filipino at para sa Pilipinas.
“Kung ito ang magiging contribution ko, then I’m very much willing na suungin iyong init, iyong pagod, itong mga bagay na ginawa ko, para sa Pilipinas,” aniya.
Sinabi pa ni Jodi na nakikita niya ang core values sa tatlong kandidato kaya naman ito ang mga sinusuportahan niya.
“Ako kasi naniniwala ako na you are who you vote for and sila iyong mga tao na nagre-resonate roon sa mga core values na napaka-importante sa akin bilang tao,” paliwanag ni Jodi.
“Importante sa akin ang pagiging matapat, importante sa akin ang pagiging hardworking, importante sa akin ang transparency and accountability and sa kanila ko nakikita iyong mga katangian na pinahahalagahan ko sa aking buhay. Kaya sila dapat,” dugtong pa niya.
Nagpasalamat naman si Jodi sa mainit na pagtanggap ng mga residente ng Barangay Tumana.
“Nakatutuwa kasi napakainit ng pagtanggap ng mga tao sa Barangay Tumana. I would say na hindi naman sila naging mga suplado or hindi kami napansin pero they’re very open, they’re very open to listen to what we have to say,” wika niya.
Nagpahayag kamakailan si Jodi ng suporta kay Atty. Chel sa pamamagitan ng post sa social media.