TINUPOK ng apoy ang gusali ng isang trucking company sa loob ng Muralla Industrial Park sa lungsod ng Meycauayan, lalawigan ng Bulacan, nitong Linggo ng gabi, 27 Marso.
Sa naging pahayag ng security guard na kinilalang si Jeffrey Casia, dakong 10:00 pm kamakalawa nang makita nilang may apoy sa bahagi ng barracks kaya agad nagpulasan palabas ang mga manggagawa sa gusali.
Umabot ang sunog sa ikalawang alarma na nirespondehan ng mga bomberong mula sa iba’t ibang lugar sa Metro Manila dahilan upang mabilis ding naapula ang apoy.
Katumbas ang pangalawang alarma ng lawak ng apat hanggang limang bahay na nasusunog at nangangailangan ng walong firetrucks upang maapula ang apoy.
Dakong 1:56 am nitong Lunes, nang ideklarang fire out ang lugar habang patuloy na iniimbestigahan ng Bureau of Fire Protection (BFP) ang pinagmulan at halaga ng pinsala sa sunog. (MICKA BAUTISTA)
