HATAW! D'yaryo ng Bayan hatawtabloid.com
ARESTADO ang apat na indibidwal matapos makipagtalo at pisikal na saktan ang mga pulis na nagtangkaNG umawat sa kanilang kaguluhan sa bayan ng Pandi, sa lalawigan ng Bulacan, nitong Linggo, 13 Marso.
Nabatid na nagresponde ang mga tauhan ng Pandi MPS sa ulat ng insidente ng alarm and scandal na nagaganap sa Brgy. Poblacion, sa nabanggit na bayan.
Tinangka ng mga nagrespondeng alagad ng batas na payapain ang gulo ngunit imbes magpaawat ang mga suspek ay sila pa ang napagbalingan na humantong sa pagtatalo hanggang pisikal silang inatake at sinaktan.
Dito umaksiyon ang mga pulis at pinagdadampot ang mga suspek na kinilalang sina Bruce Tolosa, isang retiradong pulis; Rhoann Gacuan, Roland Capistrano, welder at reservist ng Philippine Air Force; at Inok Gotis, isang negosyante.
Nakakulong sa Pandi MPS Jail ang mga suspek na nakatakdang sampahan ng nararapat na kasong kriminal sa korte. (MICKA BAUTISTA)
