Paggamit ng “drone” ipinabubusisi ni Robes sa Kongreso

NAGHAIN ng resolusyon si San Jose Del Monte City Rep. Florida “Rida” P. Robes na humihiling na busisiin ang paggamit ng drone sa bansa upang matigil ang pag-abuso at hindi wastong paggamit nito ng mga walang konsensiyang indibiduwal na lumalabag sa pribadong buhay, tulad ng nangyari sa miyembro ng kanyang pamilya.

Sa kanyang inihaing Resolution No. 2473, nanawagan si Robes sa House Committee on Transportation na magsagawa ng imbestigasyon bilang gabay sa paglikha ng batas upang matukoy ang kasalukuyang kalagayan ng paggamit ng drone sa bansa sa gitna ng napaulat na pag-abuso at hindi tamang paggamit nito na sumasaklaw na sa karapatan ng isang tao sa pribado nilang buhay, kaligtasan at seguridad.

Binanggit niya ang nakasaad sa Memorandum Circular No. 21 na may petsang Hunyo 2014 na inilabas ng Civil Aviation Authority of the Philippines (CAAP) na nagsasaayos sa paggamit at operasyon ng unmanned aircraft vehicles (UAV) sa bansa.

Idinugtong niyang bagama’t ang pagsasaayos sa paggamit nito ay hindi kinakailangan ang pagpaparehistro o permiso upang makapagpalipad ng drone bilang libangan, may itinakda namang lugar at pangyayari na kinakailangan ang lisensiya at rehistro para makapagsagawa ng operasyon.

               “Under CAAP rules, licenses are needed if the drone is operated commercially or weighs more than seven (7) kilograms or if the drone will be flown in restricted conditions such as  going inside restricted air space, conducting night flights, flying over populated areas, and going above maximum altitude. The Rules specifically state that drones are not allowed to go into private places and populated zones which include subdivisions and residential areas,” pahayag ni Robes

Kamakailan lamang, sinabi ni Robes na naging biktima ang kanyang pamilya ng ilegal na operasyon ng drone nang may magpalipad nito sa paligid ng bahay ng kanyang mga magulang sa Bustos, Bulacan, na halos pumasok na sa kanilang kusina.

“Such intrusion clearly violated CAAP Rules on drone operation because this not only posed risks to our safety but also to our privacy and security,” ani Robes.

Napapanahon aniya ang imbestigasyon sa drone operation lalo na’t maraming ulat ng nakawang nagaganap sa Bustos at iba pang lugar na naisasakatuparan sa tulong ng drones.

May posibilidad din aniya na magamit ang drone sa pagiging partisan sa politika lalo na’t panahon ngayon ng halalan.

               “There is a need to conduct an investigation, in aid of legislation, in order to determine the prevalence of drone operations in the country, how their operations are monitored and supervised and revisit existing regulations to guard against undue violations to rights to privacy, safety and security,” pahayag ni Robes.