SA GITNA ng pagkalat ng Omicron variant ng CoVid-19, nadakip ang dalawang pinaniniwalaang mga talamak na tulak ng ilegal na droga sa ikinasang operasyon ng mga awtoridad sa bayan ng Marilao, lalawigan ng Bulacan, nitong Miyerkoes, 12 Enero.
Sa ulat kay P/Col. Rommel Ochave, acting provincial director ng Bulacan PNP, kinilala ang dalawang nadakip na suspek na sina Emmanuel Encio, alyas Rocky, ng St. Louis Compound 3, Malinta, Valenzuela; at Angelita Ramos, alyas Lita, ng Brgy. Abangan Norte, Marilao.
Nakompiska mula sa mga suspek ang tinatayang P222,360 halaga ng hinihinalang shabu sa ikinasang buy bust operation ng Drug Enforcement Unit (DEU) ng Marilao Municipal Police Station (MPS) sa Brgy. Poblacion 1, sa nabanggit na bayan, dakong 11:30 pm, kamakalawa.
Nakompiska sa dalawa ang tatlong piraso ng selyadong plastic sachet ng shabu na tinatayang may timbang na 32.7 gramo at Dangerous Drug Board (DDB) value na P222,360 at buy bust money.
Kasalukuyang nakadetine ang mga suspek sa Marilao MPS Custodial Facility at nakatakdang sampahan ng kinuukulang kaso sa hukuman. (MICKA BAUTISTA)
