(ni MICKA BAUTISTA)
PATAY agadang isang pump operator, samantala isa ang namatay, pito ang malubhang nasugatan nang sumabog ang isang vaulted water tank sa Bagumbayan Warehouse Facility ng Bulakan Water District Company sa Brgy. Bagumbayan, bayan ng Bulakan, lalawigan ng Bulacan, nitong Sabado ng umaga, 8 Enero.
Sa ulat ni P/Col. Rommel Ochave, acting provincial director ng Bulacan PNP, kinilala ang namatay na biktimang si Ryan Mangio, pump operator; at mga sugatang sina Eduardo Carpio, tubero; Ricardo Sulit, pump operator, kapwa mga residente sa Brgy. Bambang, Bulakan; Milagros Tionloc at Jennifer Esteba, kapwa client account representatives; Joselito Esteban, checker; Jomar Esteban, driver; at isang alias Regine, helper, pawang mga residente sa Brgy. Bagumbayan, Bulakan.
Batay sa imbestigasyon, biglang sumabog ang Bagumbayan vaulted water habang nag-uusap ang mga biktima sa harap nito malapit sa Bulakan Water District Warehouse.
Patuloy na inaalam ang halaga ng kabuuang pinsalang dulot ng pagsabog kabilang ang tatlong kabahayang tinamaan nito.
Kasalukuyang nagsasagawa ng pagsisiyasat ang technical operation staff ng nasabing pasilidad upang matukoy ang sanhi ng pagsabog.
