“ANO’NG Pulis? Walang pulis pulis sa akin, magbarilan nalang tayo papatayin ko kayo!”
Ito ang sinasabi ng nagwawalang lalaki na may hawak na baril at nanlaban sa mga umaawat na pulis sa Navotas City, kamakalawa ng gabi.
Sa kulungan, na natauhan ang lasing na suspek na kinilala ni Navotas City police chief Col. Dexter Ollaging na si Richard Cailing, 43 anyos, residente sa Brgy. 128, Upper Smokey Mountain, Tondo, Maynila, nahaharap sa kasong paglabag sa Art. 155 RPC (Alarms and Scandal) and RA 10591.
Batay sa ulat ni P/SSgt. Karl Benzon Dela Cruz, dakong 11:00 pm, habang nagsasagawa ng monitoring at surveillance operations ang mga operatiba ng Station Intelligence Section ng Navotas police sa pangunguna ni P/Lt. Luis Rufo, Jr., sa kahabaan ng Sitio Puting Bato St., Brgy. NBBS Proper nang makita nila ang suspek na nagwawala at pinagbabantaan ang bawat isa sa naturang lugar.
Nilapitan si Cailing ng arresting officers saka nagpakilalang mga pulis at tinangkang awatin ang suspek ngunit imbes making, nagsisigaw at nagbanta pa.
Dahil sa patuloy na pagwawala at panlalaban, napilitan ang mga pulis na arestohin ang suspek at nang kapkapan ay nakuha ang isang kalibre .38 pistol na kargado ng tatlong bala.
(ROMMEL SALES)
