SUGATAN ang isang machine room operator nang mahulog sa pinagtatrabahuang cold storage sa Navotas City, kamakalawa ng hapon.
Ginagamot sa Tondo Medical Center (TMC) ang biktimang kinilalang si Amiel Herrera, 25 anyos, residente sa Block 1 Lot 16, Don Fernando Homes, Brgy. Niugan, Malabon City sanhi ng pinsala sa ulo.
Batay sa pinagsamang ulat nina P/Cpl. Godfrey Billy Aparicio at P/Cpl. Florencio Nalus kay Navotas City police chief Col. Dexter Ollaging, dakong 2:45 pm nang maganap ang insidente sa loob ng VVS Cold Storage sa C3 Road corner R-10, Brgy. NBBS Proper.
Sa pahayag sa pulisya ng saksing si Jeromel Oligan, 27 anyos, machine room operator din, nagtungo siya sa likurang bahagi ng cold storage para i-check up ang solenoid bulb ng kanilang machine na matatagpuan sa fourth floor ngunit laking gulat nang makita ang biktima na nahulog at tumama sa isang parallel metal bar.
Dali-daling bumaba ang saksi at humingi ng tulong sa kanilang mga katrabaho saka mabilis na isinugod ang biktima sa naturang pagamutan. (ROMMEL SALES)
