HATAW! D'yaryo ng Bayan hatawtabloid.com
NAUWI sa trahedya ang selebrasyon ng bagong taon ng isang pamilya nang malunod at bawian ng buhay ang tatlong dalagitang magpipinsan sa Balili River sa Brgy. Upper Bimmutubot, bayan ng Naguilian, lalawigan ng La Union, nitong Sabado, 1 Enero.
Ayon sa pulisya, nag-picnic sa tabing ilog kasama ng kanilang pamilya ang mga biktimang kinilalang sina Rona Joy Camarao, 17 anyos; kanyang kapatid na si Leonica Camarao, 14 anyos; at kanilang pinsang si Ruby Ann Dacusin, 17 anyos, pawang mga residente sa Brgy. Dagup, sa bayan ng Bagulin, sa naturang lalawigan.
Nabatid, nawala ang tatlong biktima habang lumalangoy sa ilog matapos kumain ng tanghalian.
Tinangkang hanapin ng kanilang mga kaanak ang mga biktimang lumulutang na ang mga katawan sa kabilang bahagi ng ilog.
Binawian ng buhay ang tatlong dalagita habang nasa biyahe patungong Naguilian District Hospital.
