P2.38-M shabu nasamsam tiangge vendor timbog

ARESTADO ang isang tindero sa tiangge na nahulihan ng P2.38-milyong halaga ng hinihinalang shabu sa lungsod ng Mabalacat, lalawigan ng Pampanga, nitong Biyernes, 10 Disyembre.

Sa ulat ni P/Lt. Col. Heryl Bruno kay P/Col. Robin King Sarmiento, provincial police director ng Pampanga PPO, kinilala ang suspek na si Rasul Sadic, alyas Elyas, kasalukuyang naninirahan sa Jao Ville, Brgy. Panda, lungsod ng Angeles, sa naturang lalawigan.

Ayon sa ulat ni P/Lt. Col. Bruno, ikinasa ang isang buy bust operation laban kay Sadic sa harapan ng Jose C. Feliciano College Foundation, Brgy. Dau, sa nabanggit na lungsod, kung saan nakompiska mula sa suspek ang 350 gramo ng hinihinalang shabu na nagkakahalaga ng  P2,380,000, buy bust money, isang Nokia cellphone; at isang itim na bag.

Kasalukuyang nakakulong si Sadic na nahaharap sa kasong paglabag sa Section 5 at 11 ng Article II ng RA 9165 o Comprehensive Dangerous Drugs Act of 2002.

 (MICKA BAUTISTA)