Miguel ayaw sa babaeng maarte

RATED R
ni Rommel Gonzales

INILAHAD ni Voltes V: Legacy star Miguel Tanfelix ang nag-iisang ugali na ayaw sa isang babae sa segment na Isang Tanong, Isang Takbo: Question Hunt Challenge ng Mars Pa More kamakailan.

Sa larong ito, kailangan sagutin nina Miguel at Matt Lozano ang iba’t ibang tanong na naka-assign sa kanila at kung sino ang mayroong pinaka-kaunting sagot na haharap sa isang consequence.

Ang unang tanong na napunta sa Kapuso actor ay kung ano ang pinakaayaw nitong ugali sa isang babae.

“Maarte,” mabilis na sagot ni Miguel na ikinagulat nina Mars Pa More hosts Camille Prats at Iya Villania.

Wika pa ni Camille kay Iya, “Grabe, ang bilis sumagot Mars. At saka may bato pa.”

Nang makuha naman ni Miguel ang tanong na: “Mas gusto mo bang nililigawan ang kasama sa work or outside work? And why?” sagot ng aktor, “Depende sa babae siguro, kung magkasundo kayo o hindi.”

Ibinahagi rin ni Miguel ang co-star na kinakabahan siyang makaeksena sa kasalukuyang proyekto. Hindi man inilahad ng aktor ang pangalan nito ngunit ito ay ang magiging tatay niya sa Voltes V: Legacy.