Tuesday , December 7 2021

Sa Bansalan, Davao del Sur
REPORTER BINARIL TODAS SA LOOB NG APARTMENT

HINDI nakaligtas sa kamatayan ang isang mamamahayag nang barilin ng hindi kilalang suspek sa loob ng isang apartment sa bayan ng Bansalan, lalawigan ng Davao del Sur, nitong Sabado ng gabi, 30 Oktubre.

Kinilala ni P/Maj. Peter Glen Ipong, hepe ng Bansalan police, ang biktimang si Orlando “Dondon” Dinoy, pinatay sa loob ng kanyang apartment/boarding house sa Mother Ignacia St., Brgy. Poblacion Uno, sa naturang bayan, pasado 6:00 pm.

Ayon sa National Union of Journalists of the Philippines (NUJP), ang Dabawenyong si Dinoy ay reporter para sa online news site na Newsline Philippines at host ng isang blocktime program sa Energy FM radio station sa lungsod ng Digos.

Nabatid na naging correspondent din ng Sunstar Superbalita-Davao at Philippine Daily Inquirer si Dinoy.

Sa ulat mula pulisya, sinabing namatay ang biktima sanhi ng mga tama ng bala ng baril sa kanyang katawan.

Dagdag ng NUJP, napag-alamang nasa loob ng isang makeshift broadcast booth si Dinoy nang barilin nang malapitan ng suspek.

Ani Ipong, nangangalap ng impormasyon ang mga imbestigador upang matukoy ang motibo sa pamamaslang.

Isa umano sa mga teorya ng pulisya na posibleng may kaugnayan sa kanyang trabaho ang pagkitil sa buhay ni Dinoy.

Nagsumite ang Bansalan MPS ng paunang report at assessment sa Davao del Sur Provincial Police Office.

Dagdag ni Ipong, kakausapin ng mga imbestigador ang mga kaanak ni Dinoy sa pag-asang makakukuha sila ng karagdagang impormasyon.

Kinuha ng mga awtoridad ang cellphone ng biktima upang tingnan kung mayroong lead kaugnay sa krimen, pati ang mga kuha ng closed-circuit television cameras malapit sa pinangyarihan ng krimen.

Nitong Linggo, 31 Oktubre, ipinag-utos ni Justice Secretary Menardo Guevarra ang imbestigasyon sa pangunguna ng Presidential Task Force on Media Security.

Samantala, kinondena ng Newsline Philippines ang pagpatay kay Dinoy at nanawagan sa mga awtoridad na bilisan ang imbestigasyon upang agad matukoy ang motibo sa likod ng pamamaslang.

Sa tala ng National Union of Journalists of the Philippines (NUJP), si Dinoy ay ika-22 mamamahayag na pinaslang sa ilalim ng Duterte administration.

        Narito ang talaan: Disyembre 2016, Larry Que; 6 Enero 2017, Mario Cantaoi; 17 Pebrero 2017, Marlon Muyco; 13 Marso 2017, Joaquin Briones; 6 Agosto 2017, Leo Diaz; 7 Agosto 2017, Rudy Alicaway; 24 Oktubre 2017, Christopher Lozada; 30 April 2018, Edmund Sestoso; 12 Mayo 2018, Carlos Matas; 7 Hunyo 2018, Dennis Denora; 23 Hunyo 2018, Manuel Lacsamana;

20 Hulyo 2018, Joey Llana; 11 Enero 2019, John Michael Decano; 10 Hulyo 2019, Eduardo Dizon; 30 Oktubre 2019, Benjie Caballero; 7 Nobyembre 2019, Dindo Generoso; 6 Mayo 2020, Rex Cornelio Pepino;

14 Setyembre 2020, Jobert Bercasio; 10 Nobyembre 2020, Virgilio Maganes; 14 Nobyembre 2020, Ronnie Villamor; 2 Mayo 2021, John Heredia; at 30 Oktubre 2021, Orlando Dinoy.

About Micka Bautista

Check Also

Barbie Imperial, Diego Loyzaga, AJ Raval

Diego iginiit wala silang dapat ipaliwanag ni Barbie

SHOWBIZ KONEKni Maricris Valdez Nicasio TINAPOS na ni Diego Loyzaga ang usapin patungkol sa kanyang girlfriend na …

Sa Pasig
3 GINANG, 1 PA TIKLO SA DROGA

KALABOSO ang tatlong ginang at isang lalaki nang bentahan ng ilegal na droga ang tauhan …

Lolo, ginang, isa pa, nalambat sa buy bust

HULI ang tatlong tulak na hinihinalang drug personalities, kabilang ang isang lolo at ginang matapos …

PASKUHAN SA MAYNILA isko moreno

Hikayat ni Yorme
“PASKUHAN SA MAYNILA” BISITAHIN

INAANYAYAHAN ni Manila Mayor at presidential aspirant Francisco “Isko Moreno” Domagoso at ni Vice Mayor …

Cold Temperature

Pinakamalamig na temperatura naitala sa Baguio, NCR ngayong taon

INIHAYAG ng Philippine Atmospheric, Geophysical and Astronomical Services Administration (PAGASA) na naitala ang pinakamalamig na …