Monday , April 15 2024

Anomalya ‘di politika dapat tutukan ng Task Force LAG (Sa Pandi, Bulacan)

NARARAPAT tutukan ng Task Force LAG ni Pandi Mayor Rico Roque ang pagpapalutang ng kato­tohanan kung may naga­nap ngang anomalya sa likod ng reklamo tungkol sa  pagbabawas ng P5,000 hanggang P10,000 sa Livelihood Assistance Grant (LAG) imbes na palutangin ang usapin ng politika.

Ito ang pahayag ni Pandi Councilor Cris Castro kasunod ng pagkakadawit ng kanyang pangalan sa imbestigasyon ng Pandi Task Force LAG mula sa rebelasyon ng isang kinilalang ‘Madam Whistleblower’ na hinikayat umano sila ng isang Konsehal Cris na mag­sampa ng reklamo sa National Bureau of Investigation (NBI).

Ayon kay Castro, hindi ito usaping politika kundi usapin ng pananagutan sa bayan para malaman ang katotohanang kung tama bang bawasan ang pera mula sa LAG at ilagak sa mga kooperatiba o mga samahan.

Dagdag ni Castro, dapat pagtuunan ng pansin ng imbestigasyon ng Task Force LAG ng Pandi ay kung may katotohanan nga ba ang mga reklamo.

Aniya, mas interesado ang nakararaming mala­man, una kung sapilitan ang pagkaltas at puwersa­hang paglalagak ng mala­king parte ng ayuda na tinanggap sa mga kina­tawan ng Magic 7 Cooperative na sinasabing para palaguin ang puhunan ng mga benepisaryo.

Nais din ni Castro na masagot ang pangalawang katanungan kung ano ang talagang pangyayari sa likod ng mga anomalya sa SAP at LAG.

Dagdag niya, kaila­ngang isang ‘neutral’ na ahensiya ang magsagawa ng pormal na imbestiga­syon kaugnay sa anomalya at hindi ang lokal na pamahalaan ng Pandi upang malaman ang mga tunay na pangyayari nang walang bahid na pag­tatakip o pagtatago ng katotohanan.

Dapat umanong mala­man kung sino-sino ang mga taong dapat imbesti­gahan kung sakali mang may katotohanan ang mga anomalya sa SAP at LAG dahil aniya, mga tauhan din ng kasalukuyang alkal­de ang mga namumuno sa Magic 7 Cooperative na nabatid na hindi nakarehistro at walang legal na dokumento.

Maganda man ang intensiyon nito, nagtataka umano ang Konsehal kung bakit agad na nasabi ang kooperatiba at bakit ito pinayagan ng kasalukuyang alkalde gayong wala pa itong sapat na dokumento para sa kanilang operasyon.

“Ito ang dapat na masagot sa imbestigasyon ng Task Force at huwag ilihis na ang lahat dahil sa politika dahil pananagutan natin sa bayan ang ayuda na ibinibigay ng pama­halaan,” pahayag ni Castro.

Gayondin, mariing pinabulaanan ni Castro ang pahayag ng isang ‘Madam Whistleblower’ na siya ang nangalap ng 20 katao upang magsampa ng reklamo sa NBI.

Iginiit ni Castro, “Ayoko na sanang patulan ang ganitong mga paratang pero to set the record straight, mahigpit kong itinatangi ang nasabing paratang at ito ay walang bahid ng katotohanan.”

Para kay Castro, pinag-aaralan na nila ang legal na aksiyon kaugnay ng malisyoso at mapanirang-puring paratang.

Ani Castro, “Uulitin ko ayaw, ko na sanang patulan ito dahil baka ang nasabing witness ay isa lamang behikulo para dungisan at akusahan ang pangalan ko in light of upcoming elections.”

Handa umano si Castro na humarap sa pormal na imbestigasyon upang mapatunayan ang ktotohanan at malinawan ang sambayanan ukol sa malisyosong pagdawit sa kanyang pangalan.

(MICKA BAUTISTA)

About Micka Bautista

Check Also

Bulacan Police PNP

2 durugista, 6 wanted, swak sa hoyo

Dalawang durugista at anim na wanted na mga kriminal ang sunod-sunod na inaresto ng pulisya …

PRO 4A handa at alerto para sa 2-Day Transport Strike

PRO 4A handa at alerto para sa 2-Day Transport Strike

Camp BGen Vicente P Lim – Nakahanda at asahang mapagbantay ang Police Regional Office CALABARZON, …

Sa 2 buybust operations sa Laguna P.5-M SHABU KOMPISKADO, 4 TULAK ARESTADO

Sa 2 buybust operations sa Laguna  
P.5-M SHABU KOMPISKADO, 4 TULAK ARESTADO

Kampo Heneral Paciano Rizal – Arestado ang apat na drug personalities sa magkahiwalay na anti-illegal …

Philippine Food and Beverage Expo 2024

 ‘Pakinggan si Villar’
ANING MASAGANA LILIKHA NG TRABAHONG MARAMI  

INIHAYAG ni Senate Committee on Agriculture  and Food chairperson Sen. Cynthia A. Villar na mababawasan …

Green card Las Piñas

Green card applications sa Las Piñas inaprobahan ni Vice Mayor Aguilar

APROBADO kay Las Piñas City Vice Mayor April Aguilar ang ilang aplikasyon para sa Green …