Jinkee dasal at Bible verses ang sagot sa mga basher

COOL JOE!
ni Joe Barrameda

NATUTUWA kami sa reaksiyon ni Jinkee Pacquiao sa mga bumabatikos sa kanyang mga post sa kanyang social media. Imbes na labanan ang mga basher, dasal at Bible verses ang ibinabato niya sa mga ito.

Bira ng iba, kesyo hindi raw dapat ipinaparangya o idini-display ang mga mamahaling gamit niya habang tayo ay nasa pandemya at naghihirap ang maraming Filipino.

Sa ganang akin, wala na tayong pakialam kung proud si Jinkee sa mga gamit niya lalo na at galing iyon sa pinagpaguran ng asawa ang ipinambili. At ‘yun ay sinusuportahan ng asawa. Tama rin na ipagtanggol siya ni Annabel Rama na isang malapit na kaibigan ni Jinkee at komo pareho silang Bisaya.

Kilala namin si Jinkee noon pa na nag-uumpisa pa lang sa larangan ng boksing si Manny Pacquiao. Nandiyan na rin kami noong dumadaan sila sa krisis ng relasyon nilang mag-asawa. Kamuntik pa nga silang maghiwalay noon at buong pagmamalaki namin siyang pinayuhan na ‘wag makipaghiwalay at isalba ang relasyon alang-alang sa mga anak.

Mabuti na lang at natauhan si Manny at naituwid ang mga pagkakamali niya noon.

Kaya tama ang ginagawa ni Jinkee at laging nasa puso ang Dakilang Lumikha at sana protektahan sila ng nasa Itaas at mailayo sila sa mga taong mapagsamantala.