Tuesday , November 30 2021

Ayuda at contact tracing

FIRING LINE
ni Robert B. Roque, Jr.

NOONG nakaraang linggo, pinuna ng Firing Line ang Department of Budget and Management (DBM) sa hindi paglalaan ng kahit isang sentimo sa contract tracing at ayuda sa 2022 National Expenditure Program (NEP) na isinumite nito sa Kongreso.

Ngayon, kasabay ng deliberasyon ng Kamara sa record na panukalang P5.024-trilyon pambansang budget para sa 2022, hinihimok ng kolum na ito ang ating mga kinatawan sa Mababang Kapulungan na magsagawa ng kinauukulang realignment upang masigurong mapopondohan ang dalawang mahahalagang bagay na ito na maging bahagi ng pagtugon ng bansa sa pandemya.

Gusto kong linawin na kahit na binago ng gobyerno ang quarantine strategy nito sa Alert Level System na nagpapahintulot sa pagbabalik-trabaho at muling pagbubukas ng mga negosyo, ipinatutupad pa rin ang mga lockdown sa mga komunidad na maraming kaso ng hawaan. Para sa libo-libo – kung hindi man milyon-milyon, simula nang ipatupad sa buong bansa ang polisiyang ito – na ang pinagkakakitaan ay natigil ng dalawang linggo, dapat na mayroong sistema ang gobyerno sa pagbibigay ng ayuda upang masigurong kahit paano ay kumakain pa ang kani-kanilang pamilya.

Bukod dito, ilang beses na bang binigyang-diin ng mga eksperto ang pangangailangan sa epektibong contact tracing upang mapigilan ang maramihang hawahan ng CoVid-19? Hindi ba’t higit na importante ang estratehiyang ito sa pagtugon sa pandemya sa ilalim ng bagong alert level system na umiiral sa Metro Manila?

Sakaling ang paghahagilap ng pondo para sa dalawang mahahalagang bagay na ito ay lubhang pahirapan para sa DBM, marahil mainam na simulang pag-aralan ang inilaang budget sa National Task Force to End Local Communist Armed Conflict (NTF-ELCAC), ang baluwarte ng mga red-taggers sa administrasyong Duterte, na mayroong P28 bilyong gagastahin sa 2022.

*         *         *

Nasinagan ng suwerte si Presidential Spokesperson Harry Roque, Jr., ngayong kalahati ng namamayaning partido ng PDP-Laban ay isinama siya sa listahan nito ng walo, sa ngayon, na kandidato sa pagkasenador sa 2022. Pero mukhang sinayang mismo ni Roque ang suwerteng ito sa pagbaon niya sa limot sa pinakamagagandang katangiang minahal sa kanya ng mga botanteng Filipino.

Bilang isang abogado na sa nakalipas na dalawang dekada (bago siya maglingkod sa administrasyong Duterte) ay kilala sa pakikipaglaban para sa karapatang pantao, masigasig niya ngayong dinedepensahan ang gera kontra droga ng gobyerno. ‘Yan ang dahilan kaya tinutulan ng Free Legal Assistance Group (FLAG), grupo ng mga kapwa niya human rights lawyer, ang kanyang nominasyon para maging bahagi ng United Nations experts panel on international law.

Hanggang isang araw, ang mukha ng Malacañang na lagi nang kalmadong humaharap sa mga mamamahayag ay naging mabangis sa harap ng mga kasapi ng sektor na pinakamalapit sa puso ng publiko bilang pangunahing depensa sa pandemya at tagapagligtas ng mga buhay.

Sa kawalang pakundangan, galit niyang kinastigo ang sektor ng medical frontliners gamit ang mga salitang pang-off-the-record. Pero sa malas, ang eksenang iyon ay naging isa sa pinaka-viral na panggagalaiti sa galit na nakuhaan ng video, na pumangalawa lamang sa parehong pagpapakita ng galit ng kanyang amo. Good luck sa Mayo, Mr. Spokesperson. Kailangan mo ‘yan.

*              *              *

SHORT BURSTS. Para sa mga komento o reaksiyon, mag-email sa [email protected] o mag-tweet sa @Side_View.

About Robert B. Roque, Jr.

Check Also

Isumbong mo kay DRAGON LADY ni Amor Virata

COMELEC seryoso ba sa campaign guidelines?

Isumbong mokay Dragon Ladyni Amor Virata TILA mahihirapang sundin ng taongbayan ang inilabas na alituntunin …

PROMDI ni Fernan AngelesI

Dorobong haciendero

PROMDIni Fernan Angeles HABANG abala ang marami sa paghahanda para sa nalalapit na halalan, sinasamantala …

Bulabugin ni Jerry Yap

JSY: The authentic Mr. Bulabugin until his death

GOOD evening, Everyone. My name is Diane, and I’m the daughter of Jerry Yap. I …

Bulabugin ni Jerry Yap

Thank you JSY for being big time suki of Gardenera

ni Almar Danguilan KUNG isa-isahin ang mga kabutihan na naibahagi ni Boss Jerry sa akin …

AKSYON AGAD ni Almar Danguilan

Alyansa palakasin para sa Pag-asa Island/WPS — Eleazar

AKSYON AGADni Almar Danguilan MATAPOS magtanim ng bandera ng bansa sa Pag-asa Island sa kalagitnaan …

Leave a Reply