HATAW! D'yaryo ng Bayan hatawtabloid.com
DINAKIP ang anak ng isang prominenteng negosyante matapos makakita ang mga awtoridad ng cocaine sa tinutuluyang silid, na kinaroroonan din ng nobyang walang malay, sa isang hotel sa San Juan, La Union nitong Sabado, 18 Setyembre.
Kinilala ni P/Maj. Gerardo Macaraeg, hepe ng San Juan MPS, ang suspek na si Julian Ongpin, 29 anyos, anak ng negosyanteng si Roberto Ongpin, dinala sa himpilan ng pulisya matapos matagpuan sa kanilang silid ang ilegal na droga at ang walang malay na kasama niyang si Bree Jonson (Breana Patricia Jonson Agunod), 30 anyos, isang pintor, residente sa Malate, Maynila.
Ani Macaraeg, hindi nila tiyak kung patay na si Jonson nang datnan nila sa hostel kaya dinala nila ang babaeng pintor sa Ilocos Training and Regional Medical Center ngunit idineklarang dead on arrival.
Isinailalim sa awtopsiya ang katawan ni Jonson upang patukoy ang sanhi ng kanyang pagkamatay.
Ayon sa pulisya, dumating sina Ongpin at Jonson sa hostel dakong 8:30 pm noong Biyernes, 17 Setyembre, saka sinundo ng kanilang mga kaibigan dakong 10:00 pm.
Sa talaan ng guwardiya ng hostel, bumalik ang dalawa 2:58 am, Sabado, 18 Setyembre.
Dakong 3:30 am nang magkaroon ng komosyon sa silid na inookupa ng dalawa na nagtagal ng halos 15 minuto.
Nakita sa kuha mula sa security camera na labas-masok si Ongpin sa silid at hindi mapakali habang umiinom ng alak.
Nagresponde ang pulisya sa natanggap nilang tawag dakong 4:30 am mula sa ospital kung saan nila natagpuan ang walang malay na si Jonson na nakahiga sa kama.
Samantala, kinukuwestiyon ng pamilya ni Jonson ang nabalitaang maagang pagpapalaya kay Ongpin at ang pagkaantala ng paglalabas ng resulta ng awtopsiya sa labi ng pintor.
Ayon kay P/Lt. Col. Abubakar Mangelen, information officer ng PNP PRO1, sinampahan si Ongpin ng dalawang bilang ng kasong paglabag sa RA 9165 o Comprehensive Dangerous Drugs Act of 2002 ngunit hindi niya makompirma ang pagpapalaya sa suspek dahil hindi sila ang direktang may hawak sa kaso.
