Sunday , July 14 2024
FIRING LINE ni Robert B. Roque, Jr.
FIRING LINE ni Robert B. Roque, Jr.

Duque, nagsosolo na

FIRING LINE
ni Robert B. Roque, Jr.

SA WAKAS, mukhang ‘di na maliligtasan ni Health Secretary Francisco Duque III ang mga alegasyon ng grabeng pagpapabaya, palpak na pamumuno, at matinding korupsiyon na matagal nang ibinabato sa kanya.

Hindi ko na mabilang kung ilang beses na pinuna ng kolum na ito si Sec. Duque dahil sa mga katiwalian sa Department of Health (DOH) at Philippine Health Insurance Corp. (PhilHealth), na parehong mataas ang pinanghahawakan niyang posisyon pero lagi niyang nalulusutan ang kontrobersiyang iniuugnay sa kanya.

Sa nakalipas na mga linggo simula nang isapubliko ng Commission on Audit (COA) ang audit report na naglilitanya sa mga ‘kakulangan’ ng DOH sa hindi tamang paggastos sa P67 bilyong pondo sa pagtugon sa COVID-19, mukhang hindi na malulusutan ni Duque ang isang ito.

Siyempre pa, tinangka ng kanyang tagapagtanggol at tagapagligtas, si Pangulong Duterte, na protektahan siyang muli mula sa mga nakaeeskandalong nadiskubre ng state auditors. Pero maging ang balabal ng proteksiyong iyon ay numipis na rin ngayong sinisikap ng Malacañang na magpakitang-gilas sa mga huling buwan ng termino ni Duterte.

Ang mga kaalyado ng Presidente, kabilang ang tinaguriang “people’s champ” na si Sen. Manny Pacquiao, ay pang-oposisyon na rin ang paninindigan dahil sa mga kapalpakan ng DOH sa ilalim ni Duque. At nariyan pa ang tinatawag na “mafia” sa DOH, na ayon kay Sen. Ping Lacson ay nagpuwersa sa mga pampublikong ospital na mag-imbak nang sobra-sobrang mga gamot na mapapaso na.

Ang pagdinig ngayon ng Senate Blue Ribbon Committee sa report ng COA laban sa DOH ay nakatuon sa mga iregularidad sa pagbili ng overpriced na facemasks at iba pang COVID-19 supplies. Inaprobahan ni Duque ang pagbili nang iutos niya ang paglilipat ng P42 bilyon mula sa DOH papunta sa Procurement Service ng Department of Budget and Management (PS-DBM).

Nang mga panahong iyon, ang PS-DBM ay pinamumunuan ng isang kasuspe-suspetsang appointee ng Pangulo — si Lloyd Cristopher Lao — na iginawad umano ang mga kontrata sa mga kompanyang may kuwestiyonableng kapital, address, operasyon, at ang ilan ay pinangangasiwaan ng mga Chinese na hindi na rin matunton.

Dahil sa isyung ito, naging komplikado na ang usapin, ayon kina Senator Franklin Drilon at Senator Lacson. Kapwa sila naniniwala na ang mga ebidensiyang lumutang sa anomalya sa DOH ay hindi lamang simpleng graft and corruption, kundi kaso na ng plunder o pandarambong na may katapat na hindi birong parusa.

Ito kaya ang dahilan kaya binago ni Digong ang kanyang tono, na mula sa paninindigan kay Duque anuman ang mangyari ay biglang kambiyo at handa na raw tanggapin ang pagbibitiw ng kalihim sa puwesto kung magkukusa ito?

Makalipas ang ilang araw, ang kanang kamay ni Duterte sa Kongreso, si Sen. Bong Go, ay may parehong apela, sinabing “dapat na mayroong magsakripisyo dahil buhay na ng publiko ang nakataya.” Kayo na ang bahalang intindihin ‘yan.

Malinaw na ang eleksiyon para sa pagkapangulo at lahat ng national at local posts ay mangyayari makalipas ang siyam na buwan at lahat ng politiko ay bundat na sa kani-kanilang ambisyon. Walang may gustong maiugnay sa isang taong tulad ni Duque. Wala na siyang pupuntahan, wala nang mapagtataguan, at wala na rin taong matatakbohan.

*              *              *

SHORT BURSTS. Para sa mga komento o reaksiyon, mag-email sa [email protected] o mag-tweet sa @Side_View.

About Robert B. Roque, Jr.

Check Also

FIRING LINE ni Robert B. Roque, Jr.

Mga mungkahi sa susunod na DepEd chief

FIRING LINEni Robert B. Roque, Jr. BAGO pa siya manumpa sa tungkulin bilang Kalihim ng …

Dragon Lady Amor Virata

Calixto ng Pasay ‘di kayang gibain

Isumbong mokay DRAGON LADYni Amor Virata KUNG mayroon man may lakas ng loob na labanan …

YANIG ni Bong Ramos

Bukod sa West Philippine Sea  
NCR, LUZON PENETRATED NA RIN NGA BA NG CHINA?

YANIGni Bong Ramos BUKOD sa West Philippine Sea (WPS), hindi nakapagtataka kung penetrated na rin …

FIRING LINE ni Robert B. Roque, Jr.

Wanted ngayon: DepEd chief

FIRING LINEni Robert B. Roque, Jr. KUNG gaano kabilis tinalikuran ni Vice President Sara Duterte-Carpio …

Sipat Mat Vicencio

Sara mag-ingat sa pambobola ni Imee

SIPATni Mat Vicencio NGAYONG pormal nang nagbitiw si Vice President Sara Duterte bilang Secretary ng …

Leave a Reply

Your email address will not be published. Required fields are marked *