Dating empleyado minolestiya
CHINESE CONTRACTOR ARESTADO SA PAMPANGA

NASAKOTE ang isang contractor na Chinese national nitong Biyernes, 27 Agosto, sa bayan ng Mexico, lalawigan ng Pampanga, sa reklamong pangmomolestiya ng kanyang dating empleya­dong babae.

Kinilala ng Police Regional Office 3 (PRO3) ang arestadong suspek na si Yanlong Xu Chen, 36 anyos, Chinese national.

Nadakip ngn mga awtoridad ang suspek sa kanyang bahay na armado ng warrant of arrest na nilagdaan ni Presiding Judge Richard Gazzingan Evangelista ng Mexico-San Luis Municipal Circuit Trial Court para sa apat na bilang ng kasong Acts of Lasciviousness sa ilalim ng Article 336 ng Revised Penal Code, may inirekomendang piyansang P144,000 para sa kanyang pansaman­talang kalayaan.

Nabatid na dating empleyado ng suspek ang 33-anyos Filipina na kanyang minolestiya mula buwan Hunyo hanggang Hulyo ng kasalukuyang taon.

Ayon sa PRO3 PNP, contractor ang suspek na nagrerepresenta sa Nanzhu Construction Company.

Kabilang si Chen sa sa talaan ng top most wanted persons ng Mexico Municipal Police Station.