Thursday , December 2 2021
FIRING LINE ni Robert B. Roque, Jr.
FIRING LINE ni Robert B. Roque, Jr.

Bigyan ng silencer si ‘Machine-gun Tony’

HINDI ako nagkaroon ng pagkakataong pagmasdan ang mga mata ni Lt. Gen. Antonio Parlade, Jr., para makita ko sana kung gaano kalawak niyang sinasalamin ang kanyang kaluluwa. Ang tiyak ko lang, kinakatawan ng kanyang maruming bunganga ang marumi rin niyang pag-iisip.
 
Hindi ko na kailangang tanungin pa ang mga senador, na tinawag niyang “stupid” kung sumasang-ayon ba sila sa akin. Sapat nang prehuwisyo ang mga ginawa niyang red-tagging sa mga naglunsad ng community pantry para abalahin ko pa sila sa pagkompirmang siya ang pinakahindi matalino sa kanyang batch sa Armed Forces of the Philippines.
 
May mga bagay talaga na wala nang pag-asa, gaya rin ng ilang utak, tulad ng sa partikular na heneral na ito, na wala nang solusyon. Ilang tao ang wala nang pinangingilagan, gaya ng may mga labi, tulad ng sa tagapagsalitang ito ng NTF-ELCAC, na walang bukambibig kundi mga walang basehang hinala at akusasyon. Mayroong mga kamay na nabibigong magkawanggawa, tulad ng may ilang puso, gaya ng sa pinunong ito ng SOLCOM, na hindi magawang makiramdam para sa mga nangangailangan o sa kabutihan ng puso ng mga taong sumasaklolo sa kanila.
 
Katoliko man o hindi, ang pananampalataya, pag-asa, at pagtulong ay tatlong theological virtues na dapat magsilbing pundasyon ng ating buhay at pananatili sa mundo. Alisin mong lahat ito mula sa tao at hindi ko alam kung anong klaseng demonyo ang mananahan sa kanya. Masasagot marahil ni Parlade ang tanong na ito kapag humarap siya sa Senado.
 
* * *
 
Sa ngayon, tama lang ang naging pasya ni National Security Adviser Hermogenes Esperon, Jr., na busalan ang matalim na bunganga ng tagapagsalita ng anti-insurgency task force ng gobyerno.
 
Siyempre pa, ang mahiwagang salita na pumatid sa kable ng mikropono ni Parlade ay “defunding.” Ano pa nga bang mas malaking dahilan kaysa P19-bilyong budget, na pinagbantaan ng mga senador na ililipat sa mga mas makabuluhang proyekto ng gobyerno mula sa NTF-ELCAC?
 
Maayos na ipinaliwanag ni Senate Minority Leader Franklin Drilon kung paanong sa bisa ng Konstitusyon ay magagawa ito ng Kongreso. At kung hindi pa malinaw ang mensaheng ito, ipinarating ni Sen. Panfilo Lacson sa maingay na heneral na handa ang Kongreso na pagdamutan ang NTF-ELCAC ng anomang budget sa 2022. Kailangan ko pa bang itanong kung anong proyekto na karapat-dapat sa bilyon-bilyong pisong budget ang maipagmamalaki ng tanggapan ni Parlade?
 
* * *
 
Ilang beses ko nang tinawag si Parlade na “Machine-gun Tony” sa walang kontrol na pagrapido ng kanyang bunganga, bahala nang tamaan ang kahit anong gumagalaw. Matagal na niyang ginagawa ito kaya naman mismong si AFP Chief of Staff Lt. Gen. Cirilito Sobejana na ang nag-utos noong Pebrero sa provost marshal general na tutukang maigi si Parlade.
Responsibilidad ng provost marshal general na tiyaking nadidisiplina at estriktong tumutupad sa mga panuntunan, polisiya, at regulasyon ang kalalakihan at kababaihan ng AFP. May panahong ang pagtutok ng pangunahing heneral sa kanyang 3-star general ay nakapagpatino kay Parlade.
 
Pero nitong huli, nang ganahan siya sa pag-uugnay sa mga pasimuno at volunteers ng community pantry sa mga komunistang gerilya, mistulang nawala na naman siya sa katwiran. Ang tanging basehan ng red-tagging niya sa kanila ay ang pantry slogan na, “Magbigay ayon sa kakayahan. Kumuha batay sa pangangailangan,” na ginawang popular ni Karl Marx, isang sosyalistang rebolusyunaryo noong ika-19 siglo.
 
Delikado itong “Kool-Aid” na iniinom ni Parlade! Marahil hindi sapat ang gag order upang patahimikin ang kanyang bunganga. Kailangan siguro niyang makaranas ng banana float ngayong tag-init, o mas mainam yata kung mapaaaga ang kanyang pagreretiro.
 
* * *
SHORT BURSTS. Para sa mga komento o reaksiyon, mag-email sa [email protected] o mag-tweet sa @Side_View.
 
 
FIRING LINE
ni Robert B. Roque, Jr.

About Robert B. Roque, Jr.

Check Also

Bulabugin ni Jerry Yap

True friendship lasts forever

MAGANDANG gabi po sa inyong lahat. Una ko pong nakilala si Jerry Yap, sa katotohanang …

Usaping Bayan ni Rev. Fr. Nelson Flores, MSCK, JD

Adviento

USAPING BAYANni Rev. Fr. Nelson Flores, MSCK, JD. NITONG nagdaang araw ng Linggo ay nagsimula …

FIRING LINE ni Robert B. Roque, Jr.

China, bully na in denial

FIRING LINEni Robert B. Roque, Jr. MAPAGKUNWARI ang China, sa ilalim ni Xi Jinping, pagdating …

Bulabugin ni Jerry Yap

Maligaya na ang birthday ko, okey na si Rommel — JSY

MARAMING salamat, Sir JSY. Nabulabog mo kaming lahat, mga tauhan mo, pamilya, lahat ng nagmamahal …

AKSYON AGAD ni Almar Danguilan

Quezon Gov. Suarez et al, kakasuhan ng plunder? Bakit?

AKSYON AGADni Almar Danguilan SASAMPAHAN ng plunder o pandarambong si Quezon Province governor Danilo Suarez. …

Leave a Reply