HATAW! D'yaryo ng Bayan hatawtabloid.com
ni ROSE NOVENARIO
HAYAANG magpatuloy na yumabong sa bansa ang pagtutulungan at pagmamalasakit sa kapwa at huwag silang gipitin.
Panawagan ito ni Justice Secretary Menardo Guevarra sa mga awtoridad na inireklamo ng profiling, red-tagging o iniugnay ang mga promotor ng community pantry sa kilusang komunista.
“Suffice it to say that a person voluntarily doing an act of kindness and compassion toward his neighbor should be left alone,” pahayag ni Guevarra.
Hindi aniya wasto na isailalim sa interogasyon ng mga pulis ang isang tao maliban kung may nilabag na batas, ordinansa, patakaran, o regulasyon taliwas sa kabutihan ng publiko.
“It is not proper for law enforcement agents to interrogate him unless there is reason to believe that he is violating any law, ordinance, rule or regulation for the good or welfare of the community,” paliwanag ni Guevarra.
Pinayohan niya ang community pantry organizers na huwag mag-fill-out ng anomang form na ibinigay sa kanila ng mga pulis.
“Organizers of community pantries have no legal duty nor are under any compulsion to fill out any forms, as these are not considered business, much less illegal activities,” giit ng Justice secretary.
Inamin kahapon ni Lt. Gen. Antonio Parlade, Jr., spokesman ng National Task Force to End Local Communist Armed Conflict (NTF-ELCAC) na binubusisi nila ang background ng mga organizer ng community pantry.
“We’re just checking itong background ng mga community pantry organizer. Habang nandoon sila sa community meron silang propaganda na ginagawa. May sinasabi silang gutom ang mga tao dahil sa kapalpakan ng gobyerno, kung ano-ano pa,” sabi ni Parlade.
Ang profiling ng mga pulis mula sa Quezon City Police District (QCPD) kay Anna Patricia Non ang naging dahilan ng pansamantalang pagtigil kahapon ng pinamunuan niyang community pantry sa Maginhawa St., Teachers Village, Quezon City.
Nagsilbing inspirasyon ang inisyatiba ni Non sa pagbuo ng may 200 community pantry sa iba’t ibang bahagi ng Filipinas sa nakalipas na isang linggo.
Nakaranas din ng harassment mula sa mga pulis-Maynila si Marikit Arellano, organizer ng community pantry sa Pandacan, Maynila kamakalawa.
Tiniyak ni Public Attorney’s Office (PAO) chief Persida Acosta na bibigyan niya ng ayudang legal ang lahat ng community pantry organizer laban sa red-tagging at harassment ng mga awtoridad.
“Huwag kayo mag-alala. Kung may huhuli po sa inyo na namimigay kayo ng pagkain nandito po ang PAO. Kami po ang magtatanggol sa inyo. Ready po kami ipagtanggol mga kababayan natin na tumutulong lamang ay sila pa ang makakasuhan,” wika ng PAO chief. “Halos limang dekada na ako namimigay. Ibig sabihin ba ako ay red? Hindi. Filipino ako,” dagdag niya.
Itinanggi nina Department of Interior and Local Government (DILG) Secretary Eduardo Año at Philippine National Police (PNP) chief Gen. Debold Sinas na may direktiba silang usisain ang pagkatao ng community pantry organizers.
Para kay Non, hindi na sila magpapaapekto sa mga nag-aakusa sa kanila bilang mga komunista sa social media at itutuon na lamang ang atensiyon sa adbokasiyang makatulong sa kapwa sa pagbubukas muli ng community pantry sa Maginhawa St., ngayong araw.
