NAGPAULAN ng basag na bote ng serbesa sabay naghamon ng suntukan ang isang lasing na binata makaraang biguin ng nililigawang babae sa Malabon City, kamakalawa ng gabi.
Sa kulungan na natauhan ang suspek na kinilalang si Joshua San Miguel, 20 anyos, residente sa Dulong Jacinto St., Brgy. Ibaba ng nasabing lungsod.
Batay sa pinagsamang ulat nina P/SSgt. Jeric Tindugan at P/Cpl. Renz Marlon Baniqued, dakong 6:30 pm nang maganap ang pagwawala ng suspek ilang metro ang layo sa bahay sa nasabing lugar.
Maaga pa umano nang mag-inom ang suspek sa tabing tindahan at nang malasing ay naalala ang pagkakabasted sa kanya ng nililigawang magandang babae dahilan upang magwala at maghamon ng away.
Dito nagresponde ang mga tanod na sina Alvin Abadicio at Joselito Villanueva at agad na inaresto ang nabasted na lalaki.
Nahaharap sa kasong alarm and scandal ang suspek na si San Miguel na sising-sisi sa kanyang ginawang pagwawala nang mahimasmasan at mawala ang epekto ng alak. (ROMMEL SALES)
