BINAWIAN ng buhay ang isang notoryus na tulak nang makorner sa loob ng banyo sa isinagawang drug bust ng mga kagawad ng San Isidro municipal police station nitong Martes, 2 Marso, sa bayan ng San Isidro, lalawigan ng Nueva Ecija.
Kinilala ni P/BGen. Valeriano de Leon ang suspek ayon sa ulat ni P/Col. Jaime Santos, na si Alfie Tuazon, 39 anyos, kabilang sa drugs watchlist at lider ng Alfie Tuazon drug group, na kumikilos sa naturang bayan at labas-masok sa kulungan sa kinasasangkutang mga kasong may kaugnayan sa droga.
Nabatid na pumalag ang suspek nang mapagtantong mga alagad ng batas ang nakatransaksiyon at mabilis na tumakas at pumasok sa loob ng bahay ng mga Santiago.
Pinutukan ng suspek ang mga operatiba na gumanti ng mga putok na nagresulta ng kanyang kamatayan.
Nakuha ng mga nagrespondeng Scene of the Crime Operatives (SOCO) ang baril ng suspek, isang pakete ng hinihinalang shabu at marked money na ginamit sa operasyon.
(RAUL SUSCANO)
