LAHAT ng PBB housemates ay nominado for eviction ngayong Linggo pagkatapos mapangalanan si Kyron Aguilera bilang ikapitong evictee sa PBB Connect.
Mahigpit ang laban sa Bahay Ni Kuya pero sa huli, ang Shy Biker Boy ng Butuan na si Kyron ang kinulang sa boto na 11.19% na pinagsamang Kumu at text votes. Nanguna naman sa botohan si Gail na may 16.18% na sinundan ni Ralph na nakaani ng 13.70%.
Ngayong Linggo, Araw ng mga Puso ay mahaharap ang housemates sa isang heartbreaking challenge dahil silang lahat ay kasama sa listahan ng nominado for eviction.
Dapat ipanalo ng housemates ang inihandang laro ni Kuya na Game of Hearts, na dadaan sila sa tatlong laro na magbibigay sa kanila ng pagkakataon na iligtas ang kanilang sarili sa posibilidad na mapalayas sa PBB house.
Kamakailan, usap-usapan ang naging ‘Chisquiz’ task ng housemates sa social media, na itinugma nina Ralph at Gail ang mga sinabi ng housemates tungkol sa isang kapwa housemate.
Usap-usapan sa Twitter world ang quiz challenge ni Kuya na nagsilbi ring paalala sa viewers kung gaano kahalaga ang komunikasyon, pagiging maingat sa mga binibitawang salita sa kapwa, pag-amin sa pagkakamali, at paghingi ng tawad.
Trending ang #PBBChisQuizPa at pangalan ng iba’t ibang housemates tulad nina Alyssa, Andrea, Ella, Gail, Kobie, Quincy, at Ralph noong Sabado dahil sa mainit at emosyonal na mga pangyayari sa loob ng bahay ni Kuya.
May mga netizen na humanga sa pagpapakatotoo ng housemates sa naging Chisquiz at mayroon namang bumilib sa pagpapakumbaba at pag-amin sa pagkakamali ng ibang housemates.
Isa si Ella sa mga naglakas-loob na pakinggan ang mga sinabi tungkol sa kanya ng mga kapwa housemate.
At payo ni Kuya kay Ella, ”Minsan mahirap talaga malaman kung ano ang mga iniisip ng ibang tao tungkol sa’yo. Baka kailangan mo ring mag-isip kung ano ba talaga ang dahilan nito. Dahil baka ang mga sinasabi sa’yo, roon manggagaling ang tunay na pagbabago, roon manggagaling ang tunay na pagkakaibigan, at pagsasama. At doon din makikilala ang sarili mo ng lubusan.”
FACT SHEET
ni Reggee Bonoan
