KALABOSO ang isang lalaki nang arestohin ng pulisya nitong Lunes, 4 Enero, kaugnay ng panggagahasa sa anak na babae sa loob ng dalawang taon sa lungsod ng San Jose del Monte, lalawigan ng Bulacan.
Kinilala ni P/Col. Lawrence Cajipe, provincial director ng Bulacan PNP, ang nadakip na suspek na kinilalang si Charlie Rosales, 46 anyos, at residente sa Brgy. Graceville, sa nabanggit na lungsod.
Batay sa ulat, unang ipinagtapat ng 10-anyos biktima (itinago ang pangalan) sa kapatid na lalaki na ginagahasa siya ng kanilang ama kapag silang dalawa lamang ang tao sa kanilang bahay.
Ipinagtapat din ng biktima na sinimulan siyang gahasain ng ama noong siya ay walong taong gulang pa lamang at ang pinakahuli ay nitong Linggo, 3 Enero, dakong 5:00 pm, sa loob ng kanilang bahay.
Dagdag ng biktima, sa tuwing makakaraos ang ama sa panggagahasa sa kanya ay pinagbabantaan siya nitong papatayin na ikinatakot niya.
Isinumbong ng kapatid na lalaki ng biktima ang insidente sa mga tanod ng Brgy. Graceville na agad umaksiyon at nagresulta sa pagkaaresto ng suspek.
Isinuko ng barangay ang nadakip na suspek sa San Jose del Monte City Police Station (CPS) at inihahanda na ng mga awtoridad ang pagsasampa ng kasong paglabag sa RA 8353 (Incestuous Rape) laban sa suspek.
(MICKA BAUTISTA)
