Ex-cop, itinumba ng 3 tandem sa QC
PATAY ang isang dating pulis matapos pagbabarilin ng anim na lalaking sakay ng tatlong motorsiklo sa lungsod ng Quezon nitong Sabado ng gabi.
Sa ulat kay Quezon City Police District (QCPD) District Director, P/Brig. Gen. Danilo Macerin, kinilala ang pinaslang na si Rodolfo Aspril, 60, dating pulis at kasalukuyang Brgy. Ex-O ng Barangay Old Balara, QC.
Ayon kay Batasan Police Station 6 commander, P/Lt. Col Romulus Gadaoni, dakong 6:45 pm nang maganap ang insidente sa Commonwealth Ave., Brgy. Old Balara QC.
Sakay ng motorsiklo ang biktima kasama si Lea Ross at papauwi nang pagbabarilin siya ng mga suspek. Hindi nasugatan si Ross.
Makaraan ang pamamaril, tinangay sa pagtakas ng mga suspek ang motorsiklo ni Aspril.
Narekober mula sa lugar ng krimen ang walong basyo ng bala ng kalibre .45.
Ipinag-utos ni Macerin ang malaliman imbestigasyon sa motibo ng krimen at pagtukoy sa mga suspek. (ALMAR DANGUILAN)
