Bading natagpuang tadtad ng saksak (Dahil sa masangsang na amoy)

PATAY na dahil sa rami ng tama ng saksak sa iba’t ibang bahagi ng katawan nang madiskubre ang isang bading sa loob ng kanyang inuupahang tindahan nang umalingasaw ang masangsang na amoy sa Malabon City, kamakalawa ng hapon.

 

Batay sa nakarating na ulat kay Malabon Police chief Col. Angela Rejano, dakong 1:40 pm nang matagpuan ang bangkay ng biktimang si Emy Yruma, 44 anyos, store owner, sa loob ng kanyang inuupahang tindahan sa Don Basilio Bautista Blvd., Barangay Hulong Duhat.

 

Sa inisyal na imbestigasyon nina P/SSgt. Jeric Tindugan at P/SSgt. Jose Romeo Germinal, umalingasaw ang mabahong amoy mula sa loob ng tindahan ng biktima na mula pa noong Sabado ng umaga ay sarado, na napansin ng saksing si Teodoro “Ted” Bernabe, 69, Kagawad ng Barangay Hulong Duhat at residente rin sa naturang lugar.

Dahil dito, nagpasya ang saksi kasama ang mga barangay tanod na sirain ang padlock ng tindahan sa pahintulot ng may-ari ng inuupahang tindahan na si Alberto Bernabe.

 

Nang mabuksan ang roll-up door, tumambad sa mga saksi ang bangkay ng biktima na nakahandusay sa sahig at namamaga na ang katawan nito kaya’t agad nilang ipinalaam sa pulisya ang insidente.

 

Lumabas sa cursory examination ng nagrespondeng mga tauhan ng NPD-SOCO sa pangunguna ni P/Capt. Sonny Boy Tepace, maraming saksak sa iba’t ibang bahagi ng katawan ang biktima.

 

Ipinag-utos ni Col. Rejano sa kanyang mga tauhan ang pagsasagawa ng follow-up investigation sa posibleng pagkakakilanlan at pagkakaaresto sa suspek habang inaalam pa ang motibo sa insidente. (ROMMEL SALES)