NAPATAY ang isang tulak na notoryus sa pangangalakal ng ilegal na droga habang arestado ang 14 drug suspects sa magkakasunod na buy bust operations ng pulisya sa lalawigan ng Bulacan hanggang kahapon, 3 Setyembre.
Ayon kay P/Col. Lawrence Cajipe, provincial director ng Bulacan Police Provincial Office, ang suspek na kinilalang si Allan Sicio ay napatay sa Carriedo Road, Melody Heights, Barangay Muzon, sa lungsod ng San Jose Del Monte, dakong 10:20 pm nitong Miyerkoles.
Nabatid na aarestohin ang suspek matapos kumasa sa ipinaing buy bust operation ng pulisya ngunit imbes sumuko ay nanlaban na nagresulta sa kaniyang kamatayan.
Narekober ng police operatives sa lugar ng insidente ang isang selyadong plastic sachet ng shabu at isang kalibre .38 pistola.
Kasunod nito, 14 drug suspects ang nasakote sa magkakasunod na buy bust operations na inilatag ng mga operatiba ng Station Drug Enforcement Unit (SDEU) ng Baliwag, Bocaue, Hagonoy, Plaridel, San Miguel, San Rafael at San Jose Del Monte PNP.
Nakompiska ng pulisya mula sa mga suspek ang may kabuuang 66 plastic sachets ng shabu at buy bust money. (MICKA BAUTISTA)
