HATAW! D'yaryo ng Bayan hatawtabloid.com
Bago nagawang makalayo at makatakas, nadakip ng pulisya ang isang lalaki matapos patayin sa saksak ang pinaghihinalaang kalaguyo ng kaniyang asawa sa bayan ng San Miguel, sa lalawigan ng Bulacan, noong Biyernes, 14 Agosto.
Sa ulat na ipinadala kay P/Col. Lawrence Cajipe, Bulacan Police director, kinilala ang suspek na si Dexter Sabijon, 37 anyos, residente sa Sitio Puyat, Barangay Tartaro, sa naturang bayan.
Samantala, kinilala ang biktimang si Benicio Rellosa, 50 anyos, residente rin ng nasabing barangay at sinasabing kalaguyo ng misis ng suspek.
Sa inisyal na imbestigasyon ng mga tauhan ng San Miguel Municipal Police Station (MPS), dakong 8:40 pm noong Biyrernes nang hanapin ng suspek ang kaniyang misis.
Dito ay natutop ni Sabijon ang misis na kainuman si Rellosa na malaon na niyang pinaghihinalaan na sumasalisi sa kanilang bahay kapag wala siya.
Biglang hinugot ng suspek ang isang hunting knife at tinarakan sa kaliwang bahagi ng katawan ang biktima na duguang bumagsak sa lupa.
Naisugod pa ang biktima sa San Miguel District Hospital para malunasan ngunit idineklara ng manggagamot na dead on arrival.
(Micka Bautista)
