HATAW! D'yaryo ng Bayan hatawtabloid.com
ni ROSE NOVENARIO
HABANG mahimbing ang tulog ng matataas na opisyal ng Palasyo sa magagara nilang bahay, may dalawang empleyado ng Malacañang na nagpositibo sa coronavirus disease (CoVid-19) ang hindi malaman kung paano iiwasan ang tumutulong bubong, malamig at malakas na hampas ng hangin at ulan sa mala-tambakan ng basurang pinaglagakan sa kanila bilang ‘isolation facility.’
Ayon sa source, ang kalunos-lunos na kalagayan ng dalawang empleyado ay taliwas sa ipinangangalandakan ng Palasyo na mala-hotel na isolation facility na minamantina ng gobyerno.
Ang dalawang kawaning nabanggit ay mula sa Engineering Office sa Office of the President (OP) at ilang araw nang nagtitiis sa pinaglagakan sa kanilang bodega cum tambakan ng mga construction materials at sirang gamit sa Palasyo.
Napag-alaman na may isang opisyal umano ng Palasyo ang nairita nang mabulgar sa media ang kalagayan nila sa tambakan kasama ng mga sirang airconditioning unit, semento, yero, bakal, at iba pang construction materials.
Anang source, masahol pa sa evacuees ng kalamidad ang sitwasyon ng dalawang Palace employees, at mistulang aso na abandonado ng kanilang amo.
Wala aniyang maayos na tulugan, kainan at palikuran sa pinagsadlakan sa dalawang kawani na napilitang manatili roon sa takot na makahawa sa ibang tao at mawalan ng trabaho kapag hindi nila sinunod ang utos ng opisina nila.
“Sigurado kahit kakarampot ang suweldo ng dalawa ay takot pa rin silang mawalan ng trabaho lalo sa panahon ngayon kaya tinitiis na lang nila ang hindi makataong trato sa kanila ng gobyerno,” anang source.
May isang quarantine facility sa Clark sa Pampanga na idineklarang pagdadalhan ng mga empleyado ng pamahalaan na nagpositibo sa CoVid-19.
Ang kasalukuyang pinuno ng OP Engineering Office ay kinilalang si Edgardo Torres, may posisyong Director IV na tumatanggap ng buwanang sahod na P137,000 sa Salary Grade 27.
“May IATF guidelines at ordinance ang ilang LGU gaya ng Maynila at Pasay kaugnay sa diskriminasyon laban sa persons with CoVid-19. Paano kung mismong Malacañang ang nagpapabaya o may diskriminasyon, kakasuhan at makukulong ba sila,” anang source.
