Prinsipal sa Cotabato itinumba ng bala
BINAWIAN ng buhay ang isang school principal nang barilin sa bayan ng Pikit, lalawigan ng Cotabato, noong Huwebes ng umaga, 23 Hulyo.
Kinilala ni P/Capt. Mautin Pangandigan, hepe ng Pikit municipal police, ang biktimang si Abdullah Hussain, 43 anyos, residente sa Barangay Fort Pikit, sa naturang bayan.
Nabatid na si Hussain ay punong-guro ng Dagadas Elementary School na matatagpuan sa Barangay Buliok.
Ani Pangandigan, sakay si Hussain ng kaniyang motorsiklo galing sa palengke nang barilin ng hindi kilalang suspek dakong 10:45 am, saka tumakas sa hindi matukoy na direksiyon.
Dagdag ni Pangandigan, patuloy na nag-iimbestiga ang mga awtoridad upang matukoy ang pagkakakilanlan ng salarin at motibo sa likod ng pamamaslang.
