Sa Maynila… 2 magnanakaw ng kable timbog

KULONG ang dalawang magnanakaw ng kable ng street light nang maaktohan ng contractor/helper ng Manila City Hall sa Ermita, Maynila.

Isinalang sa inquest proceedings sa Manila Prosecutors’ Office ang mga suspek na sina Mark Christian Leonero, alyas Tsuptsup, 18 anyos, walang trabaho ng 1917 Ma. Orosa St., San Andres, Malate, Maynila; at Jericho Mance, alyas Jepoy, 26,  binata, ng 1624 A. Lanao Avenue, Malate, Maynila.

Sa imbestigasyon ni P/SMSgt. Jay-Jay Sequera Jacob ng Special Mayors Reaction Team (SMaRT), naaktohan ni Reynaldo  Tindog, 42, contractor helper ng Manila City Hall ang mga suspek na pinuputol ang mga kable ng street lights sa kahabaan ng Apacible St., kanto ng Taft  Ave., Maynila.

Dahil dito, agad siyang humingi ng tulong sa kalapit barangay na nagresulta sa pagkakaaresto ng mga suspek.

Nang nalaman ng roving guard ng Globe Telecom na si Perie Sayco ang insidente natuklasan na ang mga suspek din ang mga respon­sable sa pagnanakaw sa mga cable ng nasabing kompanya sa area ng Malate kaya maghahain din ng reklamo ang Globe laban sa mga suspek. (VV)