Yayo, mas ikamamatay ang walang trabaho kaysa BF

NOONG nakita namin ang dating mag-asawang sina Yayo Aguila at William Martinez sa special screening ng Mia, na gumaganap sila rito bilang mag-asawa ay niloko namin sila na baka nagkabalikan sila noong ginagawa ang pelikula. Pero kapwa hindi ang naging sagot nila.

Sabi namin kay Yayo, baka naman kasi may boyfriend na siya. Pero sagot niya, wala. Ganoon din si William, noong lokohin din namin siya na baka may girlfriend na siya, ang sagot niya rin ay wala.

Biro pa ng dating matinee idol, kung maggi-girl friend siya, baka magpapa-load lang ito sa kanya.

Sa isang interview ni Yayo, sinabi niya na hindi siya naghahanap ng boyfriend.

“Naku! Ayaw ko. Mas gusto kong magtrabaho. Honestly, kapag nagdarasal ako gabi-gabi, ‘Lord, okay lang, huwag mo akong bigyan ng love life kasi hindi ko naman ikamamatay ‘yon. Pero ‘yung wala akong trabaho, ikamamatay ko ‘yon.’ Hindi ba?” sabi ni Yayo.

Dagdag pa niya, “Para sa akin habang kaya ko pang magpuyat, mag-memorize ng lines, kaya pang umarte, mas gusto kong magtrabaho. Kung bibigyan ako ng love life, why not? Pero bonus na lang ‘yon, kung wala eh ‘di okay lang.”

Kung ganyang pareho pa ring single sina Yayo at William, hindi kaya dumating ang time na magkabalikan sila? Baka sila pa rin talaga ang para sa isa’t isa, ’di ba?

Well, abangan na lang natin kung may balikang mangyayari sa dalawa.

(ROMMEL PLACENTE)