HATAW! D'yaryo ng Bayan hatawtabloid.com
ARESTADO ang veteran actress at dating sexy star na si Deborah Sun, kasama ang tatlo pa sa isinagawang buy bust operation ng mga tauhan ng Quezon City Police District (QCPD) nitong Linggo ng madaling araw.
Kinilala ni QCPD Project 4 Police Station (PS8) commander P/Lt. Col. Jeffrey Bilaro ang naaresto na si Deborah Sun, Jean Louise Porcuna Salvador, sa tunay na buhay, 60 anyos, walang asawa, walang trabaho, at residente sa Room New York Mansion, Brgy. E. Rodriguez, Quezon City.
Kabilang sa nadakip sina Gerald De Guzman alyas Gerry, 53; Angela Salvador, alyas Ate, 45; at Gonzalo Gonzales, alyas Zaldy, 49, pawang residente rin sa naturang mansion.
Ayon kay Bilaro, ang dating aktres at mga kasama, ay nadakip dakong 1:30 am kahapon, 8 Setyembre, sa nasbaing address.
Nakatanggap ng impormasyon ang mga awtoridad kaugnay sa ginagawang ilegal ng mga suspek sa nasabing unit kung kaya agad sila nakipag-coordinate sa PDEA-NCR at agad na ikinasa ang buy bust operation.
Nang matiyak na nasa loob na ng unit ang mga suspek ay agad na isinagawa ang buy bust operation at habang iniaabot ni De Guzman ang shabu sa poseur buyer ay agad dinakma ng mga nakakubling awtoridad.
Nakompiska mula sa mga suspek ang mahigit sa isang gramo ng shabu na tinatayang nagkakahalaga ng P6,800, drug paraphernalia, at P1,000 marked money.
Ang dating sexy star at ang kanyang mga kasama ay kasalukuyang nakapiit sa QCPD Project 4 Station (PS8) habang inihahanda ang kasong paglabag sa Section 11 & 12 of RA 9165.
Si Sun ay pinsan ng pangunahing aktres sa seryeng Killer Bride na si Maja Salvador. Ang kaniyang amang si Leroy Salvador, aktor at director, ay kapatid ng ama ni Maja na si Ross Rival. (ALMAR DANGUILAN)
