HATAW! D'yaryo ng Bayan hatawtabloid.com
IPINAG-UTOS na ni Manila Mayor Isko Moreno ang pagpapahinto ng mga business license at mayor’s permit ng lahat ng Philippine Charity Sweepstakes Office (PCSO) gaming outlets sa lungsod.
Bilang pagtalima sa naging direktiba ni Pangulong Rodrigo Duterte, inatasan ni Moreno ang officer-in-charge ng Manila Business License office na i-withdraw ang mga lisensya at permits na inisyu sa lahat ng PCSO gaming outlets.
Magugunitang ipinahinto ni Duterte ang lahat ng gaming operations kabilang na ang lotto sa ilalim ng PCSO dahil sa umano’y kurapsiyon.
HATAW News Team
SIMBAHAN SASAKLOLO
SA APEKTADO NG PCSO
GAMING SHUTDOWN
NAKAHANDA ang Simbahang Katolika sa paglingap sa mga dukha sa pamayanan na mangangailangan ng tulong tulad ng pagpapagamot na kadalasang inilalapit sa Philippine Charity Sweepstakes Office (PCSO).
Ipinahayag ito ni Balanga Bishop Rupert Santos kasabay ng pagpatigil ni Pangulong Rodrigo Duterte sa operasyon ng mga gaming scheme ng PCSO na pangunahing pinagkukuhanan ng pondo ng ahensya para sa mga social services sa publiko.
Sinabi ni Bishop Santos na sa pagpatigil ng gaming scheme ng PCSO, paiigtingin ng Simbahan ang mga programang makatutulong sa mahihirap na mamamayan sa bansa.
Ayon sa Obispo, ang bisyo ng pagsusugal ay nagiging ugat ng krimen at korapsyon sa lipunan kaya’t mahalagang maiwasan ito ng tao bago tuluyang magumon sa pagbibisyo.
Matatandaan na nitong July 25 nang ipinag-utos ni pangulong Duterte ang pagpapatigil sa lahat ng gaming schemes ng PCSO dahil sa matinding katiwalian ng ahensya na kinasasangkutan ng iba’t-ibang opisyal.
Hinimok naman ng Malakanyang ang mga Filipinong humihingi ng tulong medikal sa PCSO na sumulat sa Office of the President upang matugunan ng gobyerno ang kanilang pangangailangan.
Sa kasalukuyan higit na sa 23,000 outlets ang naipasara kung saan 7,768 ang lotto outlets; 13,320 small town lottery kiosks; 2,194 na Peryahang bayan habang 472 naman ang Keno shop.
Umaasa si Bishop Santos na ipagpatuloy ni Pangulong Duterte ang mga hakbang sa pagpigil ng korapsyon sa lipunan para sa kapakanan ng mga Filipino.
DOJ sa NBI:
KORUPSIYON
SA PCSO
IMBESTIGAHAN
Ipinag-utos na ni Justice Secretary Menardo Guevarra sa National Bureau of Investigation (NBI) ang pagsasagawa ng imbestigasyon sa umano’y korupsyon sa Philippine Charity Sweepstakes Office (PCSO).
Sinabi ni Pangulong Rodrigo Duterte na korupsyon ang rason ng pagpapasara sa lahat ng gaming operation ng PCSO.
Sa department order, naglabas ng direktiba si Guevarra sa NBI na imbestigahan at gumawa ng case build up sa sinasabing talamak na korapsyon sa ahensya at ilang gaming operations nito.
Ayon sa kalihim, ang imbestigasyon ay magsisilbing oportunidad sa PCSO para ipakitang walang nagaganap na korupsyon sa kanilang operasyon.
Oras na mapatunayang mayroong sangkot sa korupsyon, sinabi ni Guevarra na agad magsampa ng kaso laban sa mga responsable rito.
Nilinaw naman ni Guevarra na hindi pareho ang ipinag-utos na closure order sa pagsuspinde sa buong ahensya.
Matatandaang sinabi ni Presidential spokesman Salvador Panelo na papangalanan ng pangulo ang mga sangkot sa umano’y korapsyon sa takdang panahon.
