HATAW! D'yaryo ng Bayan hatawtabloid.com
IBANG klase rin talaga itong si National Youth Commission (NYC) Ronald Cardema.
Para siyang adik na haling na haling puwesto.
Wala namang masama kung sariling bulsa niya ang binubutas niya.
Ang siste, siya ang kasalukuyang chairman ng NYC, at pinaniniwalaang ‘nagagamit’ niya ang pondo ng ahensiya para sa kampanya ng Duterte Youth Party-list na ang first nominee ay kanyang misis na si Ducielle.
Paano nangyari ‘yun?
Nitong nakaraang 12 Mayo, eleventh hour na naghain ng substitution si Cardema kapalit ng kanyang misis sa Duterte Youth party-list bilang first nominee.
Eleventh hour talaga ‘yan dahil kinabukasan, 13 Mayo ay eleksiyon na.
Mayroong dalawang argumento: una, naghain ng substitution si Cardema sa Commission on Election (Comelec) nang hindi nagre-resign sa NYC.
Iba pa ang usapin kung papaboran ng Comelec ang petisyon nilang substitution.
Ibig sabihin, nanatili siyang chairman ng NYC habang naghahangad na maging first nominee ng Duterte Youth party-list.
Ikalawa: may intensiyon pala siyang mag-party-list e bakit hindi pa nag-resign agad sa NYC?
Marami tuloy ang nag-iisip na mukhang ginamit ni Cardema ang pondo ng NYC para sa kampanya ng Duterte Youth Party-list.
Kaya walang ipinag-iba si Cardema sa mga politikong ang ginagamit na prinsipyo ay weder-weder lang.
At higit sa lahat, kapag nasa kusina, asahan ang dalawang bagay: malapit ka sa grasya o kaya’y lagi kang mauulingan.
Alin sa dalawa ang nangyayari ngayon kay Cardema?!
Pero ang sabi ng matatanda, ang suwapang sa puwesto sa gobyerno, tiyak na makakadena sa karma.
At mukhang nag-uumpisa na ‘yan, dahil mukhang hindi alam ni Cardema, na ang kalipikadong kinatawan ng Duterte Youth party-list ay hanggang 30 anyos lang.
‘E 33 anyos na siya?! Papasa pa kaya ang petisyon niya sa Comelec?
At ngayong nabisto na rin ng Malacañang na ‘iniwanan’ niya ang kanyang puwesto sa NYC bilang tagapangulo, makabalik pa kaya siya?!
Tsk tsk tsk…
Sana’y laging natatandaan ni Cardema ag kasabihan: “Ang naglalakad nang matulin kadalasan kung matinik ay malalim.”
‘Yan ang tunay na kadena sa karma ni Cardema.
BI NAIA T-1 TCEU
LAGING ALERTO!
NASAKOTE ng mga tauhan ng Bureau of Immigration sa Terminal 1 ng Ninoy Aquino International Airport (NAIA) ang isang human trafficker na nagtangkang magpalusot ng tatlong Pinoy patungong Malta.
Ayon sa report ni BI Port Operations Division chief Grifton Medina, ang suspek, kasama ang mga biktima ay nakatakdang sumakay ng Eva Air flight patungo sa nasabing bansa nang mapigilan ng mga tauhan ng Travel Control and Enforcement Unit (TCEU).
Ang bansang Malta na isang tourist destination ay nagiging paboritong ‘daanan’ ngayon ng mga Pinoy na gustong magtrabaho dahil kadalasan nakalulusot ang mga kababayan natin doon kahit wala silang dalang OEC or Overseas Employment Contract na mula sa POEA.
Sang-ayon kay BI TCEU T-1 Head Glenford Comia, nagpanggap ang mga biktima na patungo sa isang business trip at sila raw ay konektado sa isang travel agency pero pinagdudahan ng Immigration Officer kaya sila ay ini-refer para sa isang secondary inspection.
Matapos ang kanilang interview, dito umamin na sila ay magtatrabaho bilang housekeepers at sila raw ay nagbayad ng halagang P310,000 sa isang recruiter na bumiktima sa kanila.
Ang mga naturang biktima ay nasa kustodiya ngayon ng Inter-Agency Council Against Trafficking (IACAT) para sa mas komprehensibong imbestigasyon. Malalaman din kung may kaukulang kaso na puwedeng isampa sa kanilang recruiter.
Samantala, pinapurihan ni BI Commissioner Jaime Morente ang naturang unit para sa kanilang accomplishment at nagbabala rin para sa iba pang recruiters na nambibiktima ng kababayan natin sa parehong kaso.
“Illegal recruiters be warned, we are committed in pursuing criminal cases against you. Your operations must stop,” dagdag ni Morente.
Excellent job, BI NAIA T-1 TCEU!
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
