HATAW! D'yaryo ng Bayan hatawtabloid.com
IBANG klase talagang makipagkaibigan si Kris Aquino. Pinatunayan niya ito nang magtungo sa campaign sortie ng sinusuportahan niyang kumakandidatong kapatid ni Anne Binay, si Junjun, bilang mayor ng Makati kasama ang vice mayor nitong si Monsour del Rosario.
Bagamat hindi ligtas kay Kris ang magpunta sa mga lugar na puwedeng makapag-trigger ng kanyang sakit, hindi niya iyon ininda para maipakita ang suporta kay Anne na ipinagdiriwang din ang kaarawan noong Lunes.
Karay-karay ni Kris sa campaign sortie ang bunsong anak na si Bimby gayundin si Erik Santos bilang regalo sa mga Binay. Nagbigay ng ilang awitin si Erik para makadagdag-saya sa mga taga-Barangay Rizal, Makati.
Gabi na nang dumating ang grupo ni Kris dahil nanggaling pa sila sa kampanya nina Bam Aquino at Chel Diokno sa Laguna pero tila nabuhayan ang mga taga-Makati na matyagang naghintay sa kanya.
Kuwento nga ni Kris, na-wow-mali sila ng pupuntahang campaign sortie. Una kasi nilang napuntahan iyong kay Abby Binay na kasabay din ang sortie malapit din lang sa street na pinagdarausan ng kampanya ng kina Junjun at Nancy. Doon din kasi sila dinala ni Waze.
Anyway, muntik na nga siyang makababa nang mapansin niya ang sasakyan ni Abby. Kaya naman ipinagtanong nila sa barangay kung iyon ba ang sortie ni Junjun. “Mabuti na lang mababait ang mga taga-Makati at sinabi nilang hindi iyon sortie ni Junjun kundi kay Abby,” natatawang kuwento ni Kris.
Hagalpakan ng tawa ang mga nanonood at may narinig pa kaming komento mula sa audience na parang nasa Kris TV lang sila sa masasayang kuwento ni Kris. O ‘di ba bongga.
Pagmamalaki naman ng isang lola, “kayo nakita n’yo lang si Kris, ako nahalikan at nakamayan ko pa.”
O ha! Iba pa rin talaga ang dating ng isang Kris Aquino!
SHOWBIZ KONEK
ni Maricris Valdez Nicasio
