DFA nagtaas ng alerto sa Libya
ITINAAS man ang Alert Level 4 ng Department of Foreign Affairs (DFA) sa Libya, hindi pa rin umuuwi ang ibang Pinoy workers dahl sa kanilang delay na suweldo kaya ayaw pa nilang umuwi sa Filipinas kahit tumintindi ang kaguluhan sa nabanggit na bansa.
“Nagsusuweldo sila (OFWs) pero dahil may restrictions sa remittances hindi nila naipapadala iyong kanilang mga pera. Marami-rami ang nagsasabing gusto nilang umuwi pero uuwi lang sila ‘pag nabayaran na sila.” pahayag ni Philippine Ambassador Elmer Cato.
Ayon sa Ambassador, sa kabila ng lumalalang kaguluhan sa Libya, nasa 40 Pinoy lamang ang nag-avail ng government’s repatriation program.
“Nakaka-frustrate din because despite our efforts to convince them na kailangan umuwi dahil napo-project nating lalala iyong sitwasyon, hindi naman natin mapilit at ini-explain nila kung bakit. Iyong mga pamilya nila diyan ang main reason,” ani Cato.
Sa report, nasa 345 katao ang nasawi at nasa 1,652 ang sugatan sa tumitinding kagulohan o factional fighting sa capital city ng Tripoli dahil sa civil war, na nagsimula noong 4 Abril 2019. Napag-alaman na dalawang Pinoy din ang nasugatan nang tamaan ng sharpnel nang sumabog ang mortar at nagpasalamat na hindi sila napuruhan.
(JAJA GARCIA)
