Parak timbog sa ilegal na droga

HULI ang isang aktibong pulis makaraang maku­haan ng  tatlong pakete ng shabu sa isang checkpoint sa Las Piñas City kahapon ng umaga.

Nasa kustodya ng Las Piñas City Police ang suspek na si PO2 Ale­jandro Hernandez, dating nakatalaga sa Manila Police District (MPD) ngayon ay nasa Regional Personnel Holding Accounting Unit ng National Capital Regional Police Office (NCRPO).

Ayon kay Las Piñas City Police chief, S/Supt. Simnard Gran, naganap ang insidente sa Bgy. Almanza Uno ng natu­rang lungsod dakong 5:30 am.

Nagsasagawa ng checkpoint ang kanyang mga tauhan sa naturang barangay nang mama­taan nila ang suspek na nagmamaneho ng motor­siklo na walang suot na helmet maging ang lala­king angkas nito.

Pinahinto sila ng mga pulis at nang kanilang rebisahin, nakita sa pulis ang tatlong pakete ng hini­hinalang shabu at tactical knife at maging ang backrider nito na hindi na nabanggit sa report ang pangalan ay nakuhaan din ng shabu.

Sinasabing dating nasangkot sa droga kaya iniwan siya ng kanyang asawa na isang pulis rin.

(JAJA GARCIA)