2 kelot binugbog ng mga senglot
MGA pasa sa mukha at katawan ang inabot ng dalawang binata makaraang pagtulungang gulpihin ng grupo ng lasing sa Taguig City, kamakalawa ng gabi.
Kinilala ng pulisya ang mga biktimang sina Adrian Fernandez, 23, online seller, ng Faculty Street, Barangay Sta. Ana; at Ralph Bardecina, 25, ng Carlos St., Bgy. Tuktukan, kapwa sa nasabing lungsod.
Nahuli agad ng mga pulis ang mga suspek na sina Barry Reyes, 30, may kinakasama, tricycle driver; at Paolo Mily, 25, kapwa ng Sand Piper Drive, Bay Breeze Subdivision, Bgy. Hagonoy, Taguig City; at Dennis Reyes, 43, may kinakasama, private employee, ng 382 Putok 5, MLQ St., Bgy. Lower Bicutan sa nabanggit na siyudad.
Batay sa ulat, naganap ang pambubugbog sa mga biktima sa Seagull Avenue, Bay Breeze Executive Village, Bgy. Hagonoy sa Taguig City, dakong 11:30 pm.
Naglalakad pauwi sina Fernandez at Bradecina nang matawag ang kanilang atensiyon ng isang grupo ng lalaki na nag-iinuman sa lugar.
Sinabing tinangka umanong dedmahin ng mga biktima ang mga suspek kaya agad silang hinabol. Nang maabutan ay pinagtulungang gulpihin ng mga suspek ang dalawang biktima sanhi ng kanilang mga sugat at pasa sa katawan.
Kaagad nakahingi ng tulong ang kanilang kaanak kina Patrolmen Arnel Gastardo, Christopher Bacoco, at Janize Baguan ng Police Community Precinct (PCP-6) , dahilan ng pagkakadakip ng mga suspek. Nakakulong ang tatlong suspek sa detention facility ng Taguig City Police at nakatakdang sampahan ng kaukulang kaso sa piskalya ng lungsod.
(JAJA GARCIA)
