HATAW! D'yaryo ng Bayan hatawtabloid.com
NANAWAGAN si former Trade and Industry secretary Mar Roxas sa Department of Agriculture (DA) na pagkalooban ng hybrid seeds at modernong kagamitan ang mga magsasaka upang mapataas ang kanilang ani.
Sa kanyang paglilibot sa iba’t ibang lalawigan, sinabi ni Roxas na ang karaniwang ani ng mga magsasaka ay tatlo hanggang apat na tonelada lamang gayong puwede naman itong pataasin pa.
“Kailangang tulungan ng gobyerno na makakuha ng magagandang hybrid seeds ang mga magsasaka. Sa Bago City, Negros na hindi kilala na rice granary, ang kanilang yield is 6-8 tons per hectare. Ito ang unang suggestion ko. Pangalawa, kung maganda ang aanihin pero mababa naman ang recovery, mapurol ang thresher at sa kalsada nagbibilad ng palay kasi walang dryer kaya maraming tapon. Dapat, i-upgrade ng gobyerno ang post-harvest facilities ng farmers. Sa dalawang paraan lamang na ito, maaaring lumaki nang singkuwenta porsiyento ang kikitain ng mga magsasaka,” sabi ni Roxas.
Bukod dito, sinabi ni Roxas na dapat din mabigyan ng kapangyarihan ang local government units na makatulong sa mga magsasakang nasa rural areas dahil mas alam nila ang pangangailangan ng mga magsasaka.
Hinikayat ni Roxas ang DA na tutukan ang irigasyon sa mga kabukiran, lalo na’t papasok na naman ang El Niño na magdudulot ng tagtuyot sa maraming bahagi ng bansa.
“Kailangan natin ng holistic approach sa pagtulong sa mga magsasaka, mula sa binhi, makinarya, pataba, patubig hanggang sa post-harvest facilities. Ito ang gusto kong isulong kapag nabigyan ako ng panibagong pagkakataon na makapaglingkod bilang senador,” sabi ni Roxas na kilalang ekonomista.
